Un total de 63 árbitras participaron no Curso Avanzado para mellores árbitras da UEFA que se realizou a pasada semana en Lisboa. As principais árbitras de Europa reuníronse para preparar o tramo final da tempada e na cita estivo a colexiada galega Zulema González.
A UEFA reúne aos árbitros e ás árbitras dúas veces por campaña, unha no inicio e outra na metade, para realizar sesións de adestramento, probas e workshops, para garantir que están nas mellores condicións para as esixencias que os agardan nas principais competicións europeas no tramo final da tempada.
No caso do fútbol feminino, o Curso Avanzado para árbitras xorde pouco despois da final da edición inaugural da UEFA Women’s Nations League e preto do inicio dos oitavos de final da UEFA Women’s Champions League, precisamente a semana en que se celebrou o Día Internacional da Muller, 8M.
A árbitra galega internacional Zulema González González foi unha das que estiveron en Lisboa a pasada semana completando o curso de inverno de UEFA, tal e como informa a RFGF.
