A xogadora catalá Gala Mestres é a primeira fichaxe do BAXI Ferrol para o seu novo proxecto na Liga Endesa.
A alero, de 28 anos de idade, foi das máis destacadas da Liga Challenge nas filas do Joventut de Badalona, no que xogou unha media de 29 minutos por partido, anotando 16,7 puntos, converténdose na segunda realizadora da competición, ademais de capturar 6,8 rebotes.
Gala Mestres é unha experta no lanzamento de tiro exterior, como o demostra a súa porcentaxe do 40% en triplos e tamén está entre as mellores en lanzamentos de tiros libres.
A xogadora xa coñece a liga Endesa, xa que militou dúas campañas no Cadi A Seu e unha en Zamora. Nas dúas últimas campañas disputou a liga Challenge.
O preparador do conxunto ferrolán, Lino López, comenta sobre a súa incorporación que “Gala Mestres é unha xogadora que xa quixen fichar varias tempadas, pero nunca foi posible. A súa última tempada e media en liga Challenge foi das mellores da liga e creo que é unha xogadora con gran tiro exterior, 1×1, rebote ofensivo e moi polivalente. Creo que ten talento e físico para ser unha boa xogadora na LF Endesa e adaptarse perfectamente á filosofía e xogo do equipo”.
Desta forma, coa fichaxe de Gala Mestres, o equipo departamental dispón de catro xogadoras tras anunciar a continuidade de Claudia Soriano, Jessica Fequiere e Marta Gómez.
Máis de 360 persoas socias na campaña de abonados do BAXI Ferrol
Segue aberta a campaña de abonados para poder renovar ou darse de alta. Polo momento, renovaron o seu abono 367 persoas, mentres que se produciron 27 altas. Todas as persoas interesadas poden pasarse pola Taberna Arauxa, no Cantón de Molins 6, de martes a domingo de 12.00 a 15.00 e de 18.00 a 22.00 horas. Tamén se poden facer as xestións a través do correo electrónico abonadosuniferrol@gmail.com
