- O excorredor profesional Alejandro Marque e quince dirixientes ‘Imprescindibles’ dos clubs autonómicos de ciclismo, entre os distinguidos con Mencións Especiais.
- O Concello de Boiro, anfitrión, recibirá un recoñecemento pola súa aposta pola mobilidade sostible.
A Gala Ciclismo Galego recupera hoxe sábado 11 de febreiro en Boiro a normalidade previa á pandemia. Se no 2022 a Federación Ciclismo Galego (FCG) volveu celebrar a súa gran festa despois da paréntese do ano anterior, pero fíxoo aplicando estritas medidas de prevención sanitaria, esta vez o protocolo principal consistirá en recoñecer traxectorias sobranceiras e aos mellores ciclistas da última temporada. Dende as 19:45 horas, cando se pecharán as portas de acceso, a Casa da Cultura ‘Ramón Martínez López’ acollerá a única xuntanza anual sen bicicletas do pelotón autonómico.
A nómina de galardoados superará a barreira das dúas centenas. A FCG entregará os premios correspondentes á pasada campaña dos seus rankings de Ciclocrós, Estrada e das especialidades de BTT, así como as distincións ás corredoras e aos corredores que obtiveron postos de podio nos Campionatos de España e nas xerais das Copas estatais. Ademais, no caso do Cross Country Maratón coroarase ás gañadoras e gañadores da Copa Galicia, unha cerimonia que se tivo que adiar tras a suspensión da última proba do calendario.
Os sete Rankings FCG suman un total de 76 gañadores. Recibirán as distincións de líderes anuais 15 ciclistas de Estrada, 13 de Cross Country Olímpico (XCO), 9 de XCM, 11 de Descenso, 11 de Enduro, 2 de Resistencia e 15 de Ciclocrós.
En canto á Copa Galicia XCM, serán chamados ao escenario os tres primeiros clasificados de cada categoría. A suspensión da Viveiro Bike Xtreme, que ía pechar o certame dos maratóns en BTT, provocou que os podios finais desta competición se adiaran ata a Gala Ciclismo Galego. Fai clic nesta ligazón para consultar as clasificacións definitivas.
‘Os imprescindibles do ciclismo’
Máis alá dos resultados do último exercicio, a Gala Ciclismo Galego’23 servirá para render unha gran homenaxe aos directivos máis históricos do deporte da bicicleta na nosa comunidade. Por ese motivo, o capítulo de Mencións Especiais contará nesta ocasión co apartado ‘Os Imprescindibles do Ciclismo’. Unha quincena de dirixentes, que teñen en común a dedicación aos seus clubs durante varias décadas, recibirán un máis que merecido recoñecemento.
Outras traxectorias distinguidas serán as de Alejandro Marque, un dos mellores ciclistas profesionais galegos do último decenio e que se retirou ao remate da pasada campaña, e o xuíz árbitro Arturo Roig Pereira. Ademais, lembraranse as figuras dos recentemente desaparecidos José Luis Neira (presidente do Club Ciclista Compostelano), Benito Carballal (piloto de Moto Volta Galicia) e a do empresario Magín Froiz. Pola súa banda, o galardón polo seu apoio ao ciclismo recaerá na empresa Aluminios Cortizo.
As Mencións Especiais serán un total de 27 e unha delas recaerá no Concello de Boiro pola súa aposta pola mobilidade sostible.
A Gala Ciclismo Galego, que será retransmitida en diferido pola TVG2, foi presentada nun acto que contou coa presenza de José Ramón Romero, alcalde de Boiro; Dores Torrado, concelleira de Deportes; e David Carrillo, secretario da FCG.
