Disque a can fraco, todo lle son pulgas. Algo así lle debe pasar ao Dépor ABANCA que ten que lidiar con outra mala nova. Nesta ocasión, a lesión dunha das súas futbolistas emblemáticas, Gaby. A a internacional Vino Tinto, que hai pouco chegaba aos cen partidos como deportivista, súmase así a Carolina Arbeláez que avanza na súa recuperación pero aínda non está lista para sumar ao grupo.
En concreto, e segundo informa o RC Deportivo, a atacante branquiazul “Gabriela García Gaby sofre unha lesión muscular no tríceps sural”.
Gaby estaba convocada pola Selección de Venezuela. Coa Vino Tinto a deportivista ía xogar a Basque Country International Women’s Cup, do 8 ao 11 de abril en Lezama e Zubieta. Debido a esta situación, os Servizos Médicos do Real Club Deportivo informaron á Federación Venezolana de Fútbol do estado físico de Gaby.
Gaby recibirá tratemento de fisioterapia
A futbolista internacional venezolana ten agora que afrontar un proceso de recuperación desa lesión muscular no tríceps sural. O RC Deportivo informa que a previsión é que esté uns días con tratamento médico e de fisioterapia. Logo, en función da evolución que teña a súa doenza, a deportista podería pasar a unha fase de readaptación deportiva como paso previo á súa reincorporación aos adestramentos co equipo ás ordes do técnico coruñés Manu Sánchez.
