O Atlético Guardés suma unha xogadora brasileira máis para a tempada 2021/2022. Trátase de Gabriela Pessoa, quen se unirá ás súas compatriotas Deborah Nunes e Tamires Anselmo no vestiario do conxunto do Baixo Miño. Este será o seu terceiro equipo da Liga Guerreras Iberdrola, ao que chega ilusionada e agardando que a afección estea coma ela, “contando as horas para facer historia no club”.
A lateral zurda de 26 anos chega procedente do CICAR Lanzarote Ciudad de Arrecife, conxunto co que conseguiu ser unha das máximas anotadoras da liga regular, con 95 goles. Respecto ao seu xogo sobre a pista, a brasileira é versátil e admite que “me gusta xogar nas tres posicións: central, lateral e extremo”.
A traxectoria de Pessoa
Gabriela Pessoa coñece de preto a competición española xa que, ademais de competir nesta tempada coas canarias, participou durante dúas campañas co Rincón Fertilidad Málaga. Posteriormente foi transferida a Israel, para xogar co equipo Maccabi Rishon, campión de Copa nos cursos 2018/2019 e 2019/2020.
Os seus inicios estiveron nas categorías inferiores do seu país, Brasil, onde tamén vestiou a camiseta da Selección en competicións internacionais desde a base. En nivel xuvenil, alzou o título de campión dos Xogos Panamericanos do ano 2010 e do 2012. Nos dous anos seguintes lograría a prata nos Xogos Sudamericanos Júnior e o ouro nos Panamericanos.
Xa no 2015, Pessoa formou parte do equipo sénior, conseguindo o seu último primeiro posto coa Selección nos Panamericanos, antes de viaxar a Israel e vivir a competición europea.
