O pasado domingo, 17 de xaneiro, o balón botou a rodar en Chaín no debut do Lóstrego CF sobre o céspede, enfrontándose nun amistoso á tamén Escola de Fútbol Feminino, a EFF Rosalía.
O resultado foi de 3-0, pero ambos equipos coinciden en que foi o menos relevante, dun partido entre clubs moi importantes para o futuro do fútbol feminino galego. “Logo de máis de 10 meses sen competir era un partido para gozar”, asegurou o técnico do Lóstrego, Gabi Couñago.
Primeira toma de contacto
Este amistoso serviu a modo de pretempada para os clubs, tal e como recorda Miguel Saa, técnico do Rosalía. “Foi unha primeira toma de contacto, igual traizoáronnos algo os nervios”, comentaba sobre a derrota.
Sobre o terreo de xogo, o novato Lóstrego foi superior, “así o marca o resultado”, recorda o adestrador rival. Segundo explica Saa, “o balón parado definiu o resultado, pero de todos os xeitos elas tiveron máis ocasións durante o partido que non acabaron en gol por pouco”.
Na primeira parte a igualdade reinaba no electrónico, así que foi na segunda cando chegaron os tantos locais en tres accións a balón parado que decantaron o amistoso para as viguesas.
Miguel Saa (técnico do Rosalía): “Estamos máis verdes quizais do que esperabamos”
Como análise propia, Miguel Saa recoñece que “estamos máis verdes quizais do que esperabamos, apenas habemos ter balón, e cando o tivemos xogámolo con medo”.
Pola súa parte, o técnico rival Gabi Couñago admitiu que foi “un partido cheo de impresiciones, que é lóxico logo de tanto tempo sen xogar”. Pero tivo parte positiva, xa que lles “serviu para facer moitas probas e adaptar ás novas xogadoras ao noso xeito de entender o xogo. Estou moi contento de ver o bo nivel das nosas xogadoras máis novas. Hoxe xogaron connosco 6 nenas en idade infantil”, explicaba.
Gabi Couñago (adestrador do Lóstrego): “Serviu para facer moitas probas e adaptar ás novas xogadoras ao noso xeito de entender o xogo”
Como valoración do seu propio xogo, o adestrador do Lóstrego sinala o potencial no balón parado, pero tamén as dificultades á hora de crear ocasións de gol claras, debido tamén “ao bo nivel en defensa do Rosalía“.
“É certo que nos custou finalizar as xogadas, algo que aínda debemos traballar moito, e tamén creo que é xusto dicir que o Rosalía dificultounos moito nos últimos metros, cunha porteira, Rocio, de moitísimo nivel”, reflexionaba.
O gañador: o fútbol feminino
Gabi Couñago quitoulle ferro á vitoria, recordando que “o resultado hoxe, e tamén o xeito de conseguir os goles é anecdótico”.
Gabi Couñago (adestrador do Lóstrego): “Crear un club neste momento de pandemia non é fácil, e para nós era un día para celebrar”
“Crear un club neste momento de pandemia non é fácil, e para nós era un día para celebrar logo de meses difíciles de traballo para que hoxe o club poida ser unha realidade”, declaraba no postpartido o adestrador local.
Tamén tivo palabras para as rivais, das que comenta que “vese un bo traballo detrás, cun gran adestrador. Admiro seu traballo desde a base e iso lles dará os seus froitos, teñen moitas xóvenes para seguir crecendo, e estou convencido de que farán unha gran tempada”.
Previsiblemente, o novo curso de Segunda Autonómica comezará a mediados do próximo mes de febreiro.
