Medíase esta fin de semana o Viaxes Amarelle FSF ás líderes do subgrupo A, o Futsi Atlético Navalcarnero que camiña invicto na competición. As galegas tentaron sorprender ao seu rival co xogo de cinco desde os 20 segundos de xogo. De feito, conseguiron aguantar as arremetidas visitantes na primeira metade que rematou cun 0-3, pero na segunda, o ciclón madrileño endosoulle ás herculinas unha dolorosa derrota por 0-11.
O partido empezaba cun Viaxes Amarelle FSF que quería dominar o balón e o xogo ante un rival moi superior. Foi por iso que Jorge Basanta optou polo xogo de cinco cando apenas pasaran 20 segundos de xogo. Á procura da sorpresa que non chegou. Tiveron o balón durante algo máis dun minuto e, na primeira oportunidade que tiveron as locais, Ame Romeu, rouba un balón en primeira liña e desde 25 metros anota e o 0-1.
A pesar do gol, as herculinas non rebaixaron a súa insistencia no xogo de cinco. Buscaron chegar á portaría defendida por Belén de Uña, pero con pouca fortuna.
Segundo pasaban os minutos, as visitantes empezaban a demostrar todo o seu potencial e empezaban a xerar xogo con perigo, e facerse co tempo do partido. Mentres que as herculinas trataban de exercer unha presión alta sobre o seu rival.
Pouco despois da medianía do primeiro período Irene Córdoba anotaba o 0-2, e a falta de 4 minutos para o tempo de asueto, Leti puña o 0-3 no marcador. Mentres, o cadro galego trataba de recortar distancias sen éxito. Rematou a primeira metade cun 0-3 no luminoso da Sagrada Familia.
Na segunda metade as visitantes empezaban máis metidas que nunca no partido e aos dez segundos María Sanz subía o 0-4 ao marcador, e apenas uns segundos máis tarde Gaby facía o propio para subir o 0-5.
Estes goles tan temperáns, desbarataron as intencións das galegas, ante un rival que xeraba moito xogo, ocasións e sobre todo goles.
As galegas trataban de aguantar as arremetidas visitantes e buscar sorprender á contra sen conseguilo. E chegou a medianía do segundo tempo con tres goles practicamente consecutivos para Futsi Atlético Navalcarnero, obra de Ari, Leti e Irene Córdoba, e levar o marcador a un 0-8.
Os ánimos da escuadra herculina estaban baixos ante tal avultado marcador, e a maiores uníase o cansazo tras contar con só tres rotacións no banco, tras as molestias de Cris Lourés durante o partido.
Ademais, o equipo laranxa xa con cinco faltas. Chegaron dúas ocasións de dobre penalti para as madrileñas, e mentres o primeiro intento íase por fóra, o segundo puña o 0-9 no marcador, obra de Ju Delgado, a falta de 4 minutos para o final.
E aínda que parecía todo finiquitado, o Futsi Atlético Navalcarnero aproveitou as postrimerías dos últimos segundos de xogo para levar o luminoso até un 0-11, tras goles de Lorrana e Ari.
O seguinte rival do Amarelle será o AE Penya Esaplugues
Logo deste partido o Futsi Atlético Navalcarnero segue líder e as coruñesas continúan terceiras pola cola (7ª posición).
O Viaxes Amarelle FSF regresará o luns aos adestramentos para preparar un difícil encontro contra un dos rivais directos neste tramo final da primeira fase na Primeira División Feminina de Fútbol sala da RFEF.
O cadro herculino disputará a xornada undécima do subgrupo A, que fora aprazada. A cita está fixada para o domingo 14 de marzo de 2021 ás 12:00 horas no Complex Esportiu Municipal Lles Moreres (Esplugues de Llobregat). As contrincantes: as futbolistas da AE Penya Esplugues. As catalanas son o equipo que precede ás galegas na táboa clasificatoria. Ambas as dúas escuadras contan con 10 puntos no seu haber.
FICHA TÉCNICA
VIAXES AMARELLE FSF: Leti Rojo, María Gómez, Anna Escribano, Patri Corral e Candela Soria – quinteto inicial -. Tamén xogaron: Lau Doce, Cris Lourés, Yaiza e Sofía.
FUTSI ATLÉTICO NAVALCARNERO: Belén de Uña, Ju Delgado, Ari, Lorrana e Ame Romero – quinteto inicial -. Tamén xogaron: Leti, Becha, María Sanz, Anita Luján, Irene Córdoba, Gaby e Marta Balbuena.
GOLES: 0-1 Ame Romero (min. 1); 0-2 Irene Córdoba (min. 12); 0-3 Leti (min. 16); 0-4 María Sanz (min. 21); 0-5 Gaby (min. 21); 0-6 Ari (min. 28); 0-7 Leti (min. 28); 0-8 Irene Córdoba (min. 29); 0-9 Ju Delgado (doble penalti) (min. 36); 0-10 Lorrana (min. 40); 0-11 Ari (min. 40).
ÁRBITROS: Martínez Torres e Ferrero Carballal del Colexio de Árbitros de Galicia. Mesa: Silva Martínez do Colexio de Árbitros de Galicia.
TARXETAS: Amosaron carton amarelo a Diego Rodríguez, Anna Escribano, Sofía e Leti Rojo do Viaxes Amarelle FSF, así como a Alberto Arranz e Leti nas filas do Futsi Atlético Navalcarnero.
INCIDENCIAS: Partido correspondente á decimosétima xornada do Subgrupo A da Primeira División Femenina de Fútbol Sala da RFEF disputado no Pavillón Municipal de Sagrada Familia, na Coruña.
