O fútbol sala feminino de Galicia saíu ben parado dos FutsalPlanet Awards 2020. O Pescados Rubén Burela foi elexido o mellor equipo do mundo no futsalfem, mentres que o seu adestrador, Julio Delgado foi segundo la loita por ser o mellor adestrador. Tamén foi segunda Peque (Burela) na pugna por ser a mellor xogadora na que Vane Sotelo (AD Alcorcón) quedou cuarta. Esa mesma 4ª posición foi a que acadou Caridad García, a gardamallas do Poio Pescamar.
Os FutsalPlanet Awards 2020 contaron con 201 persoas votantes que emitieron un total de 3015 puntos válidos repartidos nas diferentes categorías destes premios que inclúen fútbol feminino e masculino e nas que se premia a deportistas, árbitras, adestradoras e clubs.
Con este recoñecemento nos FutsalPlanet Awards 2020 o Pescados Rubén Burela FS suma unha ledicia máis aos éxitos deportivos que o ano 2020 levou aparellados no conxunto Laranxa. Tras a conquista da Supercopa de España, Liga e Copa da Raíña, ademais de 4Nations Futsal, agora tamén loce o recoñecemento como Mellor Club Feminino nestes galardóns internacionais.
A entidade mariñá ten a honra e privilexio de converterse no primeiro gran triunfador na estrea da categoría dos premios, que xa contan cunha traxectoria de vinte e unha edicións, compartindo o nomeamento con equipos de Rusia, Portugal, Ucraína, Brasil, Irán, Italia e Xapón. Esta categoría era unha das novidades deste ano nestes destacados premios internacionais do cinco contra cinco e o palmarés, ábreno ás da Mariña.
O galardón do club laranxa, que o 4 de setembro de 2021 cumprirá vinte anos de traballo, dedicación e devoción polo fútbol sala en igualdade, foi avalado por 523 votos. O luso Sport Lisboa e Leõas da Serra do Brasil completan o podio, con 450 e 428 respectivamente.
Peque e Julio Delgado, acadan o segundo posto nos FutSalPlanet
Os méritos das Guerreiras Laranxa non remataron aí xa que Patricia González Mota Peque e Julio Delgado rozaron o premio nas categorías nas que estaban nominados dentro dos premios de carácter individual.
Na loita por ser elexido Mellor Adestrador Feminino de fútbol sala, o posto de prata foi para o técnico do Burela, Julio Delgado. O cumio do apartado técnico estivo moi rifado, con tan só 17 votos de diferenza, entre a segunda praza do mariñán (432) e a da gañadora, a tamén brasileira Cristiane de Souza.
No caso da elección de Mellor Xogadora a capitá burelista Peque, recoñecida recentemente como MVP da Supercopa de España, volveu á palestra de FutsalPlanet por cuarta vez. E o fixo obtendo 478 votos, fronte aos 698 da brasileira Amadinha, triunfadora nesta categoría dende o ano 2014.
Tamén nesta categoría estaba encuadrada a galega Vanessa Sotelo Quintela, que esta tempada milita na AD Alcorcón e que rematou o concurso na cuarta praza con 264 puntos no seu haber.
Se ao ano pasado a gañadora na categoría de mellor porteira do mundo no fútbol sala feminino fora Silvia Aguete, cancerbeira do Poio Pescamar, este ano a seleccionada para loitar por ese galardón foi a súa compañeira baixo paus, Caridad García Díaz. A gardameta poiense remato o concurso en cuarta posición por detrás da lusa Ana Catarina Silva (Sport Lisboa e Benfica de Portugal), e as brasileiras Ana Carolina Caliari (Montesilvano C5 Femminile de Italia) e Patricia Moraes Faria Giga (Associação Female Futsal Chapecó de Brasil).
CONSULTA TODAS AS PERSOAS GALARDOADAS NOS PREMIOS FUTSALPLANET
