As xogadoras do equipo feminino da “Escola de Fútbol Concello de Camariñas Juan Cabrejo” desfilaban esta mañá na pasarela da Mostra do Encaixe de Camariñas. O motivo foi a presentación da nova equipación do club que conta co patrocinio do citado evento camariñán.
O pavillón Víctor Vigo acolleu esta mañá a presentación da equipación do feminino da “Escola de Fútbol Concello de Camariñas Juan Cabrejo”, co patrocinio da Mostra do Encaixe. O lema ‘Camariñas Sorprende’ loce así nas camisetas do equipo de futfem das escolas da vila coruñesa.
Os desfiles da XXXIII Mostra do Encaixe de Camariñas
A XXXIII Mostra do Encaixe de Camariñas Deputación da Coruña celébrase desde o pasado mércores 27 de marzo e durará ata o vindeiro domingo 31 de marzo. A cita, un clásico na Semana Santa galega e nomeadamente na Costa da Morte, ten este ano o lema ‘Camariñas Sorprende’ e pretende reivindicar o encaixe como un elemento de valor para coñecer o municipio, ao igual que as festas, as tradicións, as paisaxes e a gastronomía.
Durante os cinco días que dura a XXXIII Mostra do Encaixe de Camariñas as firmas da categoría de ‘Grandes Deseñadores’ súbense á pasarela da Mostra para amosar as súas creacións con encaixe. Participan: Ana Cabranes, Anamingo, Claudina Mata, Devota & Lomba, Dolores Cortés, El Pulpo, Esteban Freiría, José Matteos e Sara Lage.
Ademais, ten lugar tamén o XXX Concurso de Noveis Deseñadores no que se repartirán un total de 4.500 euros en premios e participarán 35 mozas e mozos que están a dar os primeiros pasos no mundo da moda.
Outro dos desfiles foi o ‘ArtEncaixe’, que se afianza na programación da Mostra do Encaixe de Camariñas. Participan: Alfarería La Cacharrera, Estilo Aramar, EASD Mestre Mateo, Lola Logaro, Mar Barral, Obradoiro Tonio, Ondas do Mar, O Rulo, Suso Calo, Tendataller Feituras, Yelena Molina.
A gran novidade desta edición, o desfile ‘ReEncáixame’, no que participaron: Eli Conde, Kabus, Luz Prado e Yolanda Román.
Outro ano máis volverán á Mostra as delegacións internacionais con participación de Bulgaria (Sofía), Eslovaquia (Krakovani), Francia (La Turballe), Gran Canaria (Ingenio), Italia (Gubbio), Italia (Novedrate), Italia (Trapani), Polonia (Bobowa), Portugal (Peniche), Portugal (Serra d’ el Rei), República Checa (Palickovani).
Protagonismo para a xente de Camariñas nos desfiles
Cada edición un dos momentos máis agardados da Mostra son os desfiles do ‘Pequeencaixe’. As nenas e nenos das Escolas Municipais crean o seu propio encaixe durante todo o curso para posteriormente deseñar os vestidos e desfilar na Mostra.
Este ano, as futbolistas da “Escola de Fútbol Concello de Camariñas Juan Cabrejo” tiveron tamén o seu desfile na pasarela co gallo da presentación das novas camisetas do equipo que locen o lema da Mostra do Encaixe: ‘Camariñas sorprende’.
