A Asociación de Jugadoras de Fútbol Sala (AJFSF) reclama á FIFA a celebración dun Mundial feminino desta disciplina deportiva. Mentes no cinco contra cinco os homes preparan a décima edición do seu Mundial, as mulleres non obteñen resposta sobre por que eles si, e elas non.
Natalia Orive, presidenta da AJFSF explica nun vídeo publicado nas redes sociais da Asociación de Jugadoras de Fútbol Sala os motivos que lles levan a facer pública esta reivindicación. Segundo denuncian, hai un ano que as súas peticións formais ante a FIFA non obteñen resposta algunha.
Ver esta publicación en Instagram
Explicaba hai uns días Asociación de Jugadoras de Fútbol Sala (AJFSF) nun comunicado publicado en internet:
Desde o 2015 a Asociación de Xogadoras de Fútbol sala denunciou a inexistencia dunha Copa do Mundo de Fútbol sala Feminino.
Desde ese ano reunímonos en varias ocasións cos responsables da disciplina dentro de FIFA, quen prometeu en cada un dos encontros a realización dun Mundial.
Decidimos romper a confidencialidade das reunións xa que ningunha das promesas leváronse a cabo.
Por esta mesma razón, o 2 de novembro desde a AJFSF Internacional reunirémonos en conferencia de prensa xunto a distintas xogadoras recoñecidas a nivel mundial.
Porque se non nos quixeron escoitar.
Agora terannos que ver.
É dicir, que, fartas de promesas que non se materializaban desde a AJFSF deciden optar por facer públicas non só as súas reivindicacións, se non tamén o incumplimento por parte da FIFA que, aseguran, “prometeu en cada un dos encontros a realización dun Mundial”.
Se isto fose un partido, o futsalfem vai perdendo por 10-0 fronte ao masculino. Esa é a diferencia de edicións entre competicións mundialistas dunha mesma disciplina deportiva se miramos o xénero. Segundo explica a AJFSF hai un ano que o colectivo de futbolistas reclamaba novamente á FIFA a organización desta competición inexistente, até o de agora, para a categoría feminina. Falan de “trato discriminatorio”.
Hai uns días avisaban nas súas redes: “Se antes non nos quixeron escoitar… agora vannos ter que ver”.
Ver esta publicación en Instagram
A advertencia fíxose realidade hoxe coa publicación de dous vídeos. Nun deles Natalia Orive, presidenta da AJFSF aparece rodeada de futbolistas de diferentes nacionalidades como a arxentina Julia Dupoy (que xoga no Pescados Rubén Burela FS), a brasileira Amandinha ou a ucraína Vika Kyslova (que xogan no o Melilla Sport Capital Torreblanca FS que adestra o galego Morenín) e a española Anita Luján (que xoga no Fútsi Atlético Navalcarnero).
Ver esta publicación en Instagram
Na outra peza audiviovisual as protagonistas son directamente xogadoras internacionais de diferentes nacionalidades. Participan futbolistas das seleccións de Brasil (Amandinha), Arxentina (Julia Dupoy), España (Anita Luján), Ucraína (Vika Kyslova), Paises Baixos (Nancy Loth), Xapón (Chikage Kichibayashi), Portugal , Uruguay (Fátima Villar), Irán (Zahra Loffabadi) e Italia (Ersilia D´Incecco).
Entre todas as xogadoras van ligando frases nas que, como un equipo cheo de estrelas internacionais, lanzan a seguinte mensaxe conxunta como unha soa voz:
- “En 1989 FIFA organizou o primeiro Mundial de Fútbol Sala masculino”
- “E o noso?
- “Ano tras ano prométennos unha Copa do Mundo!”
- “A igualdade non puede ser una promesa”
- “Tener un Mundial, tampouco”
- “E aquí seguimos”
- “Entrenando, entrenando, entrenando, entrenando”
- “Ata cando?”
- “Nós tamén xogamos”
O vídeo remata co texto:
“FIFA organiza o Mundial de futsal masculino número 10.
As xogadoras seguen sen ter un”.
Efectivamente, como apuntan no vídeo as futbolistas, o primeiro Mundial de futsal masculino xogouse no ano 1989. En 2022 tivo lugar a novena edición que gañou a Selección de Portugal. As seleccións masculinas xa están preparando a 10ª edición da súa Copa do Mundo. As femininas… non están convocadas.
Tirando de retranca e de música poderíamos versionar unha coñecida canción e preguntar algo que parece ter so un incomprensible silencio por resposta: E o feminino para cando?
Si hai un Campionato de Europa de futsalfem pero non un Mundial
O Europeo é, arestora, a máxima competición internacional que unha xogadora de fútbol sala pode aspirar a disputar.
En moitas partes do mundo existen competicións de futsalfem fortes no ámbito ámbito estatal. Queda clara tamén a demanda por parte das xogadoras para poder disputar esa competición. Pero a resposta da FIFA non chega. Por que?
Texto íntegro do comunicado da AJFSF no que se reclama unha reunión para a posta e marcha dun Mundial de fútbol sala feminino:
En setembro do 2021, dirixímonos á FIFA polo mal trato e abandono público cara ás xogadoras de fútbol sala. Un ano despois, seguimos sen respostas oficiais. Mentres que o fútbol sala masculino prepárase para o seu décimo mundial, a FIFA segue sen organizar a nosa primeira edición.
Estamos reunidas por primeira vez na historia para denunciar publicamente o trato discriminatorio.
Esiximos con urxencia unha reunión oficial co máximo responsable. Necesitamos un compromiso real dunha vez por todas. A igualdade de xénero non se vai lograr con promesas baleiras.
Se antes non nos quixeron escoitar… Agora terannos que ver
Ver esta publicación en Instagram
Fóra de cámara, a través das súas redes sociais, moitas son as futbolistas galegas ou que militan en clubs galegos, que amosaron o seu apoio á campaña do colectivo de futbolistas compartindo, principalmente vía historia de Instagram a ligazón ás pezas audiovisuais da AJFSF ata conseguir facelas virais.
Nese camiño de reivindicación e apoio a esta acción da A Asociación de Jugadoras de Fútbol Sala (AJFSF ) ante a FIFA atopamos a deportistas como: Antía Pérez, Jozi Oliveira, Dany Domingos, Peque, Sol Pedrera, Elena Aragón, Cami, Uxía Rodríguez, Carla Rodríguez ou Adriana García. Estes nomes son so unha escolla, a lista é moito máis longa.
Téñense sumado tamén a adestradoras como Mondo, que prepara este curso ao Ourense Envialia, e Gonzalo Iglesias Morenín, que ocupaba ese banco ata o pasado ano e dirixe agora ao Melilla Sport Capital Torreblanca FS. Na reclamacións achegan o seu apoio incluso clubs como o Burela FS ou o Atlético Arousana.
É imposible incorporar a lista de todas a voces que no deporte do cinco contra cinco feminino se alzan desde terras galegas compartindo o vídeo da AJFSF para pedir un Mundial de FutSalFem xa!