A Real Federación Galega de Fútbol, Ecoembes e a Consellería de Medio Ambiente, Territorio e Vivenda da Xunta de Galicia colaborarán co fin de achegar a reciclaxe e a correcta separación dos residuos a aproximadamente un cento de campos e instalacións deportivas de clubs integrados nesta entidade. Así consta no convenio asinado durante a tarde onte no Campus Sur da Universidade de Santiago co obxectivo principal de fomentar a recollida selectiva de envases lixeiros, papel e cartón no eido deportivo.
O presidente da RFGF, Rafael Louzán, agradeceu á Xunta de Galicia a súa presenza no acto e animou á sociedade en xeral a facer unha correcta reciclaxe. Cómpre salientar que a Federación ten un firme compromiso co Medio Ambiente e en todas as sedes federativas de Galicia existen colectores especiais.
A conselleira Ánxeles Vázquez, pola súa banda, lembrou que tanto os afeccionados como os propios xogadores adoitan consumir botellas de auga e comida durante os partidos de fútbol, un costume que non hai que cambiar pero si adaptar co fin de garantir tamén nos campos uns correctos hábitos de reciclaxe. Neste sentido, explicou que pequenos xestos como cambiar as “botellas de plástico” por outros envases reutilizables ou substituír o papel de aluminio por opcións de tea ou outros materiais para envolver o bocadillo son tamén unha boa contribución a fomentar a recollida selectiva e a concienciación da sociedade sobre o coidado do medio ambiente.
Concretamente, o acordo asinado incluirá a instalación de papeleiras e colectores especiais dentro dos campos de fútbol pero tamén na zona de vestiarios e nas cantinas, naqueles casos en que dispoñan das mesmas. Ademais, Ecoembes e a Real Federación Galega de Fútbol tamén colaborarán ofrecendo charlas informativas e de divulgación en materia de reciclaxe dirixidas tanto aos seus socios como aos afeccionados.
Neste sentido, Ángeles Vázquez incidiu na importancia e no “gran impacto” que terá este convenio para achegar a reciclaxe ao mundo do fútbol profesional galego, xa que, lembrou, a Federación agrupa a máis de 1.200 clubs de toda a comunidade e conta nestes momentos con aproximadamente 100.000 fichas expedidas.
A implicación do deporte galego na promoción da separación de envases lixeiros, papel e cartón en clubs e instalacións vencelladas a distintas disciplinas deportivas experimentou un gran pulo desde o ano 2017, cando Ecoembes comezou a asinar convenios de colaboración con distintas entidades.
A finalidade común de todas as accións que xa se están a desenvolver en colaboración con algunhas das entidades deportivas máis importantes de Galicia é contribuír ao impulso da economía circular no conxunto da comunidade e, neste caso concreto, no eido deportivo da alta competición.
Selección Galega Feminina
As xogadoras da Selección Galega Feminina tamén foron testemuñas do acordo que asinaron as tres partes este mércores en Santiago de Compostela. O combinado galego que dirixe Vicky Vázquez realizou o seu primeiro adestramento da campaña no campo da USC e aproveitou a xornada para participar na foto de familia.
Ademais, o presidente da RFGF, Rafael Louzán, fixo entrega dunha camisola da Selección Galega á conselleira Ánxeles Vázquez e ao Director de Xestión Local e Autonómica de Ecoembes, Ángel Hervella.
