- APEM e o Dépor Genuine disputaron un partido de fútbol amigable como ferramenta de inclusión e de concienciación ao respecto da saúde mental.
O equipo de fútbol da Asociación Pro Enfermos Mentais (APEM) xogou contra o Dépor Genuine na cidade deportiva Arsenio Iglesias da Coruña coa intención de concienciar sobre a saúde mental onte na tarde. O conxunto de APEM estaba patrocinado por Coruña The Style Outlets.
O encontro amigable contou con catro períodos de 10 minutos cada un nos que cada equipo pode sumar como máximo un punto por parte, indistintamente dos goles marcados, e cada xogador ten que xogar polo menos unha parte e como máximo tres.
🤝 O #DéporGenuine e a @ApemCoruna xogan mañá un partido amigable con motivo do recente #DíaMundialdelaSaludMental
🕘 O encontro, organizado pola #FundaciónRCDeportivo, terá lugar na Torre a partir das 18:15 horas
🔗 https://t.co/eWfbCyEQSJ pic.twitter.com/DEMAPDXqfA
— RC Deportivo (@RCDeportivo) October 16, 2023
O Dépor Genuine é un conxunto mixto no que militan mulleres como Nuria que estivo no campo neste partido co número 17 nas costas.
Con motivo do Día Mundial da Saúde Mental e na súa “liña de devolver á sociedade o que os seus clientes lle achegan”, Coruña The Style Outlets explica que está organizando neste mes “unha serie de actividades relacionadas con esta temática para concienciar sobre a importancia do benestar psicolóxico”.
A primeira cita foi onte á tarde na cidade deportiva da Torre-Arsenio Iglesias, onde o equipo de fútbol da Asociación Pro Enfermos Mentais (APEM) xogou un amigable contra o Dépor Genuine. Coruña The Style Outlets é patrocinador do club de APEM.
Outras accións ao fío da saúde mental
Para sensibilizar aos máis novos nesta temática, Coruña The Style Outlets organiza unha charla no IES Eduardo Blanco Amor de Culleredo o vindeiro xoves 26 de outubro. O obxectivo da mesma é achegar aos adolescentes a problemática das enfermidades mentais, moitas veces un tema tabú ou controvertido, e concienciarlles sobre a importancia de coidar o seu benestar mental. O relator será Txema Iparraguirre, psicólogo e responsable de Centro de rehabilitación persoal e social “Sara Vázquez-APEM” (Casa Rosa do Burgo).
Tamén está prevista unha charla interactiva “Así somos”, de Molo Cebrián e Luis Muiño, do pódcast “Entende a túa mente” nas instalacións do centro comercial o próximo día 3 de novembro. Calquera persoa interesada poderá escoitala e participar nela.
