A Real Federación Galega de Fútbol e Gadis fixeron entrega esta semana das máis de tres toneladas de comida que foron recadadas na Campaña de Nadal Solidaria que puxo en marcha a Federación coa importante colaboración da empresa galega de alimentación.
Estes 3.000 quilos de alimentos tradúcense no número de espectadores que seguiron en directo as dúas xornadas do Boxing Day Solidario organizado polo Comité Galego de Adestradores da RFGF e nas que participaron Ramón Rodríguez Monchi, director xeneral deportivo do Sevilla FC; o técnico Quique Setién; o ex xogador de fútbol sala Paulo Roberto; e o actual mellor xogador do mundo de fútbol sala, o brasileiro Ferrao.
Cabe destacar que esta iniciativa solidaria que puxo en marcha outro ano máis a entidade que preside Rafael Louzán contou con dous padriños de luxo: o futbolista galego do Real Madrid, Lucas Vázquez, e a xogadora internacional de fútbol sala Vane Sotelo, actualmente nas filas da AD Alcorcón.
Banco de Alimentos e Cociña Económica de Santiago, beneficiarios
O acto de entrega tivo lugar esta mañá na sede da RFGF en Santiago de Compostela. No mesmo estiveron presentes Rafael Louzán, presidente da RFGF; os vicepresidentes Javier Vázquez e Fernando Iglesias; o presidente do Comité Galego de Adestradores e director da Escola, Iván Cancela; o delegado federativo Javier Reyes; a responsable de márketing do grupo Gadisa, Iria Rodríguez; o presidente do Banco de Alimentos de Galicia, José Pita; e a directora da Cociña Económica de Santiago, sor Alicia Lourido.
Louzán: “A RFGF sempre estará detrás de todo o que importa en Galicia”
O presidente da RFGF, Rafael Louzán, quixo “agradecer moi sinceramente a Gadis por compartir coa Federación e con distintas entidades benéficas que están a realizar un traballo extraordinario. Tamén quero agradecer aos padriños, tanto a Lucas Vázquez como a Vane Sotelo. Isto non será algo illado. A Federación sempre estará aí e quero remarcar iso, que a RFGF sempre estará detrás de todo o que importa en Galicia. Somos conscientes de que hai moitas familias que están a pasar moitas dificultades”.
Iria Rodríguez, responsable de marketing do grupo Gadisa, salientou que “para o grupo Gadisa supón unha gran satisfacción. Estamos moi contentos de poder colaborar nestas iniciativas e sempre tentaremos axudar a todo isto tipo de entidades que se envorcan durante todo o ano cos máis o necesitan. Gadis colabora con máis de 130 oenegués con colaboracións directas durante todo o ano, e en canto a Federación se puxo en contacto con nós non o dubidamos en ningún momento”.
Tamén tiveron palabras de agradecemento as dúas entidades ás que irán directamente estas máis de tres toneladas de alimentos. O presidente do Banco de Alimentos de Galicia, José Pita, apuntou que “para o Banco de Alimentos, máis aló dá cantidade, é que hai institucións como a Federación que queren axudar e que sempre están aí. Para nós é moi importante. Todo o que recollemos é para a xente que máis o necesita. O deporte non ten nada que ver con nós, pero isto serve para demostrar que o fútbol está cos que máis o necesitan”.
Por último, a directora da Cociña Económica de Santiago, sor Alicia Lourido, destacó que “é de gran axuda. Estamos a pasar por momentos moi difíciles. É un orgullo pensar que hai persoas solidarias que colaboran no día a día coa Cociña Económica. De pouco valerían as nosas mans se non existen estas institucións que nos axudan”.
