O Comité Galego de Adestradores da Real Federación Galega de Fútbol, coa colaboración do Concello de Marín e do clube local Áncora D´Ouro, organizou durante o día de onte en Marín unha xornada formativa baixo o título de “Fútbol e TDAH. Unha visión dende as fortalezas”. Un evento de gran interese, que estivo aberto a todos os públicos maiores de 16 anos (adestradores, directivos, pais…). A actividade tivo lugar na Biblioteca Municipal.
Nesta xornada liderada por Martina Ares Ferreirós, Doutora en Dificultades de Aprendizaxe e Procesos Cognitivos e profesora da área de Psicoloxía Evolutiva e da Educación na Universidade de Vigo, falouse de mitos e realidades que envolven o trastorno, así como pautas psicopedagóxicas de actuación en relación ao protocolo da Xunta de Galicia.
Os nenos con TDAH (Trastorno por déficit de atención con ou sen hiperactividade) necesitan liberar tensións acumuladas tras unha longa xornada escolar na que se lles esixe estar quedos e atentos. Para que poidan canalizar o seu exceso de enerxía e actividade dun modo seguro e adecuado non hai nada mellor que practicar deporte.
Cales son os deportes máis axeitados para os nenos con TDAH?
Debido a que as situacións sociais adóitanlles bloquear é importante elixir aquelas actividades ou deportes que lles permitan obter a máxima diversión e o mínimo estrés social. Contan, os expertos no tema, que a natación, o ciclismo, o excursionismo e o fútbol son algúns dos deportes máis axeitados para estes nenos e nenas.
Tamén se fixo unha análise de como levar estas medidas ao terreo de xogo, ademais das vantaxes do fútbol para traballar e mellorar. En resumo, poñer enriba da mesa as fortalezas que presentan as persoas con TDAH e cales poden ser beneficiosas para o fútbol.
No evento estivo presente o presidente do Comité Galego de Adestradores e director da Escola, Iván Cancela, que agasallou a Martina Ares cunha camisola da Selección Galega.
