O Dépor ABANCA caía derrotado en Lezama 2-1 ante o Athletic Club, pero o fixo dando unha imaxe boa e amosándose como un equipo que pode dar moito que falar un ano máis.
Sobre o verde de Lezama todo cheira a fútbol e a goles. Na cancha, esta tarde, estaban dous clubs con escudos con historia. As leonas locais do Athletic Club, e As Nosas branquiazuis do Dépor ABANCA. Vestir esas camisetas é meterse na pel de entidades centenarias, unha mezcla de responsabilidade e pracer. Hoxe, as futbolistas que desplegaron o seu fútbol sobre ese tepe bilbaíno fixeron honra a esa historia en ambas as dúas escuadras.
Nunha tarde fría de outono en terras biscaíñas o Dépor ABANCA saltou ao campo algo aletargado cedéndolle o control do xogo ás locais no arranque do partido. Con todo, Peke tivo unha ocasión nun remate de cabeza a pase de Alba Merino aos cinco minutos de xogo.
O primeiro gol do cruce chegaría no minuto 19 froito dunha internada por banda esquerda de Arana que meteu o balón á área para que, María Díaz, que lle gañou a posición a Noelia Villegas para logo rematar en carreira entrando con forza un balón que non foi quen de atallar Sullastres (1-0). María Díaz xa tivera algunha chegada con perigo previamente.
Tivo unha nova ocasión nas súas botas Peke case a continuación pero sen éxito no remate. Avisou Lady Andrade do seu perigo un par de veces e, como se adoita dicir, tanto vai o cántaro á fonte, que acaba por rachar (ou por saber ir só, elixan a versión que máis lles preste).
A mundialista e olímpica coa Selección de Colombia de fútbol roubou un balón na zona media do campo, avanzou entrando polo centro e superado o borde da área e á defensora rival que tentou frear o seu ímpetu. Nada parecía frear a Lady Andrade que viu o tiro e non dubidou en tentar bater a De la Nava unha vez máis, desta volta con éxito. O seu foi un tiro con perna dereita que viu porta poñendo o 1-1 no marcador no minuto 51 de partido.
Estreouse así a colombiana Lady Andrade como deportivista en partido oficial e como anotadora. Móvese como pez na auga cando pisa área, nótase que está no seu terreo e quere mandar. Busca porta con verticalidade e non para ata acadar o premio, o gol.
Se no arranque da primeira metade as branquivermellas foran as dominadoras, na segunda metade o control do esférico e do tempo do xogo foi galego. Athletic Club confiou a súa sorte aos contragolpes e non tivo éxito ata case o final do partido.
No minuto 81 chegaría o segundo tanto das locais a través dunha xogada cun balón colgado á area desde a banda esquerda do ataque do Athletic Club. Ao centro non chegou a primeira rematadora, pero en carreira apareceu desde atrás Monente que, dentro da área pequena, non tivo piedade de Sullastres.
Sánchez introduce tres cambios nas fúas futbolistas
Nesa recta final do encontro moveu o banco Manu Sánchez á procura de que o cambio de futbolistas constituíse dalgun xeito un revulsivo. Así, nos últimos minutos optou por meter no campo a xogadoras como a Kika, a Michelle e a Lía. Mais a sorte foi esquiva para as coruñesas que perderon un partido que ben poidera ter rematado en táboas dado que houbo un tempo para cada un dos equipos e bo xogo por ambas as días partes.
Di o refraneiro popular que as cousas non son como comezan, son como rematan, así que unha derrota no primeiro partido de Liga na Primera Iberdrola 2020-21 non significa nada se o xogo das branquiazuis segue a construirse así, con alegría e ambición.
FICHA TÉCNICA
ATHLETIC CLUB: De la Nava, Moraza, Naroa, Valdezate, María Díaz (Monente, min. 63), Jone Ibañez (Nerea Nevado, min. 67), Unzúe, Oihane (Sierra, min. 67), Eunate Gimbert y Arana (Nekane, min. 58).
DÉPOR ABANCA: Sullastres, Villegas, Blanco, Bedoya, Cris, Iris (Lía, min. 89), Alba, Athenea, Lady Andrade, Gaby (Michelle, min. 85) y Peke (Kika, min. 85).
GOLES: 1-0 María Díaz (min. 19); 1-1 Lady Andrade (min. 51); 2-1 Monente (min. 81).
ÁRBITRA: Acevedo Dudley (c. Catalán) Amoestou á deportivista Blanco (min. 61).
INCIDENCIAS: Partido correspondente á 1ª xornada da liga Primera Iberdrola disputado en Lezama ante uns 300 espectadores.
📽️ RESUMEN I La victoria de las leonas en su estreno en la @PrimerIberdrola #AthleticClubFem 2⃣-1⃣ @RCDeportivo pic.twitter.com/4F0n3h4Nse
— Athletic Club (@AthleticClub) October 3, 2020
O Dépor ABANCA, rumbo á Coruña por estrada
Segundo informa o RC Deportivo, “concluído o encontro en Lezama, o Deportivo ABANCA emprende viaxe por estrada á Coruña. Manu Sánchez citou de novo ás súas futbolistas o martes 6 de outubro ás 17:00 horas en Abegondo”.
O vindeiro domingo 11 de outubro ás 12:00, o Dépor ABANCA recibe na Cidade Deportiva de Abegondo á Real Sociedade, na segunda xornada na Primeira Iberdrola.
