No tempo do COVID-19 as furgonetas da Federación Galega de Balonmán cambiaron o deporte polo voluntariado e están a formar parte de fermosos proxectos que se están a desenvolver en Vigo e Pontevedra.
Hai xa varias semanas, unha das nosas furgonetas foi cedida ao Concello de Pontevedra para o programa Porta a Porta, realizado pola Concellería de Benestar Social en colaboración co Servizo de Deportes e o Banco de Alimentos. Reparte alimentos entre a poboación máis vulnerable, e para iso necesitan dos medios de transporte facilitados pola Federación Galega de Balonmán. En total asisten a case 600 persoas, que necesitan comida nesta crise sanitaria.
Ordenadores e tablets para os máis pequenos
E agora, as furgonetas da FGBM están a colaborar co Concello de Vigo no reparto de material informático para entregar aos nenos e nenas que non teñen ordenadores ou tablets para poder seguir as clases de forma telemática. O reparto destes equipos informáticos estase a realizar estes días con persoas voluntarias do Concello de Vigo.
Aínda que ese non é o traballo normal e esperado para os vehículos, a verdade é que desde a Federación Galega de Balonmán amosáronse encantados de colaborar con este tipo de proxectos, nun momento no que a aportación de todas e todos é imprescindible. “Antes estabades na bancada animando, agora somos nós os que temos que apoiaros!”, reza o comunidado da FGBM.
