As ferrolás do BAXI, que adestra Lino López teñen no ascenso á Liga Feminina Endesa un obxectivo que non as deixa baixar a guardia ante ningún rival para non perder o ritmo. Nesta ocasión, a súa ‘vítima’ foi outro conxunto galego o Celta Zorka Recalvi que cae un posto na clasificación que rematan a xornada terceiras. As da Cidade Departamental amosáronse superiores ás viguesas ás que venceron por un marcador de 78-52.
Ao inicio do partido ambos os dous equipos posaron xuntos cunha pancarta en alusión á visibilización das mulleres co gallo do 8M. O BAXI Ferrol puxo en marcha unha acción en colaboración co Concello de Ferrol e o comercio local para levar ás deportistas do conxunto ferrolá a diferentes escaparates neste mes de marzo adicado á muller.
O BAXI Ferrol demostrou ante o Celta Zorka Recalvi, terceiras clasificadas, que está no bo camiño para chegar á fase de ascenso en condicións de buscar subir á liga Feminina Endesa. As de Vigo so levaban cinco derrotas antes de pisar A Malata, pero o furacán BAXI non levanta o pé do acelerador ante ningún rival e tampouco o fixo coas celestes.
Vintecinco vitorias de vintecinco partidos, esa é a bagaxe das ferrolás no que levamos de tempada na Liga Feminina 2. E iso que o equipo do BAXI Ferrol sufriu un contratempo no quecemento coa lesión de Irene Gari, o que lle impediu disputar o partido. Tamén tivo problemas antes do salto inicial Cristina Cantero que viu como se quedaba sen Mariona Martín e Celia García Paunero. A maior complicación xurdiu debido a que a súa ausencia complicaba a rotación
Así e todo, o BAXI Ferrol fixo un gran traballo, cunha defensa moi intensa que impedía que o seu rival puidese anotar con facilidade. As celestes non eran quen de atopar como superar ao xogo defensivo local. As de Lino López forzaban o dous contra un nos currunchos na subida de balón o que levou a que o primeiro cuarto terminase cun 18-8.
O segundo parcial tamén foi dominado pola escuadra departamental, que foi ampliando a súa vantaxe cun parcial de 26-18 que lle permitiría chegar ao descanso cunha cómoda renda de 44-26.
Reacción do Celta
Logo do paso por vestiarios houbo unha reacción a escuadra celeste. O equipo vigués saíu moi forte e endosoulle ás locais un parcial de 2-13, colocáronse o partido cun 46-39. As olívias xogaron os seus mellores minutos na Malata e foron que de manter a raia á defensa local que na primeira metade as levara polo camiño da amargura.
En ataque, as pupilas de Cristina Cantero optaron pola verticalidade lideradas por Stamenkovi. Parecía que o Celta Zorka Recalvi podía remontar o choque e que non todo estaba perdido para as de Vigo, pero as pupilas de Lino López volveron apertar en defensa para terminar por detrás no parcial do terceiro cuarto 13-16 pero por diante no global do partido 57-42.
No últimos dez minutos, a formación ferrolá incrementou o ritmo e conseguiu un parcial de 21-10 que serviu para sentenciar o choque e celebrar coa súa afección un claro triunfo por 78-52, o que lle permite seguir contando os seus partidos por triunfos. E xa van 25…
A xogadora máis valorada das locais foi Patricia Benet con 22 seguida de Brooke Salas con 18. Nas filas do Celta Zorka Recalvi a xogadora máis valorada foi Stamenkovic con 14. No que respecta á anotación, Patricia Benet e Sune Swart asinaron 15 puntos cada unha dos 78 do total do BAXI Ferrol, convertíndose dese xeito nas máximas anotadoras do partido.
Aínda resta unha última xornada da liga regular
A última xornada da liga regular levará ao BAXI Ferrol á cancha do Instituto Rosalía de Castro de Santiago de Compostea, onde exercen de locais as tamén galegas do Ulla Oil Rosalía. Será o vindeiro día 27 de marzo ás 19:00 horas xa que a xornada ten horario unificado. O cruce será arbitrado polos colexiados Diego Fernández Requejo e Christian Abalo Buceta.
No caso do Celta Zorka Recalvi, as celestes pecharán a súa participación na liga regular na súa pista do pavillón de Navia recibindo ao Maristas Coruña.
FICHA TÉCNICA
78) BAXI FERROL: Brooke Salas (7), Laura Fernández (-), Geraldynn Malama Leaupepe (2), Patricia Benet (15) e María Anniina Aiajanen (6) – quinteto inicial -. Tamén xogaron: Patricia Cabrera (13), Julieta Mungo (3), Natalia Rodríguez (7), Andrea Boquete (10) e Sune Swart (15).
52) CELTA ZORKA RECALVI: Ainhoa Lacorzana (2), María Margarita Davydova (-), Lucía Fontela (7), Maja Stamenkovi (12) e Adrienne Marie Motney (14) – quinteto inicial -. Tamén xogaron: Noa Comesaña (-), Clara Prieto (5), Sara Vidal (-) e Rosemarie Julien (10).
PARCIAIS: 18-8, 26-18, 13-16 e 21-10
ÁRBITROS: Andrés Esteban Domínguez e Samuel Martínez Covelo. Sinalaron 17 faltas ao BAXI Ferrol e 21 ao Celta Zorka Recalvi.
INCIDENCIAS: Partido disputado no pavillón municipal da Malata en Ferrol, con aforo reducido a 300 espectadores debido á pandemia de COVID-19. O conxunto local agradeceu á súa afición o seu apoio cunha pancarta.
