A III Copa Promesas de halterofilia sub15 e sub17 deixa grandes resultados para o deporte galego. Ruth Fuentefría colgouse o bronce na súa proba, mentres que Paula Canedo acadou o récord español en arrincada sub15.
A competición, na que participan o top 10 de cada modalidade segundo o ránking da Federación Española de Halterofilia, serve como test previo aos Campionatos de Europa sub15 e sub17, previstos para finais de agosto en Polonia.
As halteras galegas na Copa Promesas
Entre as tres representantes da halterofilia galega, a máis destacada foi Ruth Fuentefría, quen competiu na categoría sub17. A galega do CH Coruña foi terceira nos 49 kg, levantando 61 kg en arrincada, 68 en dous tempos, e acadando 129 kg no total olímpico. En total, sumou 201,64 puntos sinclair.
Tamén foi sobresaínte a actuación na Copa Promesas de Paula Canedo, do mesmo club herculino, quen acadou o récord español en arrincada sub15, levantando 65 kg. En dous tempos, a haltera levantou 75 kg, chegando aos 140kg no total olímpico. Finalmente, acadou os 170,14 puntos sinclair.
Pola súa parte, Amy Abelleira, do CH Vigo, resultou sexta clasificada no sub17, levantando 69kg en arrincada, 86kg en dous tempos e con 155kg no total olímpico.