Desde o máis fondo da táboa clasificatoria. Ese será o punto de partida do Peluquería Mixta Friol nunha nova xornada da Liga Reto Iberdrola. Colleitar a vitoria no seu último partido, como era de supoñer, non se traduciu nunha mellora inmediata na situación do equipo lucense. Porén, de obter ese mesmo resultado este domingo na súa visita ao Madrid CFF B, o conto podería ser ben distinto.
Ambos equipos disputarán ás 18:00 o último encontro da xornada. Saltarán ao verde, polo tanto, coñecendo os resultados dos seus rivais directos. Se ben as madrileñas tamén se atopan na zona vermella da táboa, con 12 puntos, mantéñense a tan só un da salvación. Nin o Friol, nin o Pozuelo de Alarcón, nin o Sporting de Gijón, empatados con 8 puntos, poderían alcanzar ás da capital logo desta fin de semana.
Desde Friol, cun ollo en Valladolid e outro en Gijón
Este mes de febreiro será decisivo para as de Geluco Villar e José Manuel Ponfe. Os catro partidos que quedan por diante, o deste domingo incluído, son agora mesmo determinantes. Non hai marxe de erro posible. O único consolo é que hai outros dous conxuntos na mesma situación. Ambos enfrontan como locais a rivais moi por riba na táboa clasificatoria.
Coa bagaxe da súa última vitoria na Reigosa, as lucenses viaxan a Madrid coas forzas renovadas e cun cadro de xogadoras que xa demostrou que aínda lles queda moita guerra que dar. Comandadas por Fanny, que a semana pasada volveu a ser determinante, no once podería aparecer a última incorporación friolesa, Ali Carranza, que deixou moi boas sensacións no seu debut ante o CD Parquesol.
Ahí tenéis la entrevista que @LiderRedaccion hizo a nuestra jugadora Nere Lombardero. Es una de nuestras promesas del filial, que pese a su juventud tiene las ideas muy claras y con su ilusión, esfuerzo y sacrificio se ha ganado a pulso un hueco en el primer equipo 👏👏👏👏 pic.twitter.com/xCUcFlCTwi
— PMFRIOL (@pmfriol) February 2, 2021
A xuvenil Nerea Lombardero, que no último partido partiu de inicio e marcou, tamén podería volver a entrar nos plans de Ponfe. O adestrador, que afronta o seu segundo partido en competición oficial ao cargo do Friol, agocha polo momento as súas cartas. A Madrid coa vitoria na cabeza.
