Coa primeira parte da competición da Primera Nacional xa entrando no tramo final, tres equipos galegos seguen mantendo un pulso polos primeiros postos. O Viajes Interrías aguanta como líder, aínda que unha derrota ante o PM Friol e a vitoria do Sárdoma fai que lucenses e pontevedresas apreten ao primeiro clasificado.
Ao remate da 18ª xornada, as de Portonovo encabezan o grupo norte con 36 puntos, o Sárdoma marcha segundo con 35, e un por debaixo está o Friol.
Seguindo coas clasificacións galegas, o Dépor ABANCA B sitúase en cuarta posición, con 29 puntos, o Umica CF é sexto con 25, as cebras do Victoria CF son sétimas, tamén con 25 e a UD Mos, Victoria FC e SD Villestro pechan a táboa, con 15, 11 e 0 puntos respectivamente.
O Friol vence ao Interrías e recorta distancias
A fin de semana chegaba cun duelo de altura no fútbol galego. PM Friol e Viajes Interrías, dous dos mellores equipos da categoría, víanse as caras en terras lucenses.
Alí, as xogadoras adestradas por Covi Regueiro non deixaron escapar a súa oportunidade e dobregaron ás de Luis Treviño. Apostando por unha intensidade alta desde o comezo, as locais fixéronse co dominio do xogo fronte a un conxunto aínda tocado polas semanas de parón obrigado pola COVID-19.
Con todo, o Interrías puido presumir de ocasións, aínda que o Friol mostrábase superior e, sobre todo, máis efectivo en ataque. O primeiro gol das lucenses non tardaría en chegar e materializouse no minuto 9, obra de Blanca.
O Interrías tivo que conformarse con aguantar os golpes e intentar aproveitar as escasas ocasións a balón parado. Con todo en contra, as visitantes tiveron que lamentar tamén a lesoón de Sara García, que deixaba o verde despois de recibir un golpe.
Na segunda metade, o Friol seguiu dominando no campo, xerando perigo na área rival e controlando as ofensivas das visitantes. As lucenses rondaban o 2-0, que finalmente chegaría no 65 da man de Blanca, quen transformou un penalti. O conxunto local remataría o partido no 77, cun terceiro gol de Ana Bonilla.
Con este 3-0, as lucenses recortan distancias, e ademais lévanse o golaveraxe, xa que na primeira volta perderan por un 2-0.
Tres puntos para Sárdoma e Dépor ABANCA B
Importante vitoria tamén a do Sárdoma, que venceu ao filial do Sporting de Gijón por un 3-0, sumando puntos para achegarse á primeira posición do grupo.
As viguesas recibían en casa ás asturianas, un equipo da zona baia da clasificación. Nas Relfas as locais adiantáronse pronto no marcador, cun gol de Yaiza no minuto 13. As de David Ferreiro seguiron competindo en busca do segundo, pero o descanso chegaría co marcador conxelado no 1-0.
Para a segunda parte, as locais seguían sendo superiores ao Sporting de Gijón, que malia intentalo non gozaba de ocasións de gol. Quen si estivo acertada fronte a portería rival foi Nerea Cruz, que anotou o 2-0 no minuto 79. Sobre o pitido final, Paula Lorenzo faría o 3-0, confirmando o bo momento deportivo das galegas.
Con este novo triunfo, o Sárdoma suma 12 partidos puntuando, dos últimos 15 disputados.
Outra das goleadas da xornada estivo protagonizada polo Dépor ABANCA B, que visitaba a domicilio ao SD Villestro, para anotar cinco goles e levarse os tres puntos da vitoria. Con este resultado, as filiais coruñesas son cuartas, a cinco puntos do PM Friol, mentres que as compostelás mantéñense colistas con 0 puntos.
O resto de galegas
No resto de duelos con participación galega, o balance foi de dúas derrotas e unha vitoria.
A UD Mos caeu ante o Versalles A, por un solitario gol anotado por Carmen Peñalver de penalti pasada a media hora de xogo. A outra derrota foi a do Victoria FC de Santiago, que xogaba ante o Olímpico de León, que se sitúa na zona morna da táboa.
As compostelás viron como unha serie de erros permitían ás visitantes adiantarse no marcador cun gol no 34 e outro no 37, pero non baixaron os brazos. O premio chegaría no 78, cun tanto de Sara Pena, pero o impulso non foi suficiente para chegar ao empate.
Mellor sorte correu o Victoria CF da Coruña, que sumou tres puntos tras vencer ao Gijón FF. As cebras de Cris Oreiro viaxaban a terras asturianas para competir contra un rival da súa liga.
A primeira metade foi un pulso entre ambos equipos, que remataría coa mínima vantaxe para as galegas, ao conseguir abrir o marcador no minuto 45 co 0-1 cun gol de Alba. Tras o descanso, as cebras seguiron concentradas, anotando o 0-2 no 53, obra de Raisa.
As asturianas tardarían en responder, anotando no 80 mediante Irene Martínez, aínda que sen posibilidades de ameazar a vitoria coruñesa.
