A loita polo ascenso a Reto Iberdrola segue candente. Na última xornada, o Viajes Interrías, que lideraba o grupo 1 desde a xornada 12, só conseguiu salvar un punto. Pola contra, o PM Friol asinou unha goleada que lle valería tres puntos e o regreso á primeira posición, iso si, empatadas a puntos coas de Portonovo.
En terceira posición marcha un Sárdoma CF que está a quedar descolgado da primeira posición, ao estar a cinco puntos dos dous primeiros clasificados e non sumar na 19ª xornada. Quen si sumou foi o Dépor ABANCA B, que se pon a tiro de pedra das viguesas, con 32 puntos, tras vencer ao UD Mos, 12º.
O Umia CF tamén sumou tres puntos para subir á quinta posición, onde acumula 31 puntos. A 19ª xornada tamén deixou un derbi entre o Victoria CF e Victoria FC, con vitoria para as coruñesas, que marchan sétimas, fronte ás santiaguesas, que seguen en risco de descenso na 13ª posición. Derrota tamén para o SD Villestro, que segue unha xornada máis colista.
Goleada do Friol ante o Sporting B
As xogadoras do PM Friol regresan ao máis alto da táboa, arrebatándolle o liderado ao Viajes Interrías no que manteñen un ollo posto ao sumar tamén 40 puntos.
As lucenses visitaban ao filial do Sporting de Gijón, rival da zona baixa, e en terras asturianas deron mostra dun espectáculo de goles. As galegas dominaron o encontro desde o pitido inicial e pasados os dez primeiros minutos, Blanca Cros abría a lata para as amarelas.
O segundo gol faríase esperar, debido ao aumento na intensidade da defensa branquivermella e un par de ocasións das locais que estiveron preto de poñer o empate no luminoso. As de Covi Regueiro souberon agardar a súa oportunidade, e asestaron o segundo golpe no minuto 35, desta vez da man de Alicia Martínez.
Na segunda metade, o Friol afianzou a súa superioridade cun festival goleador. Blanca Cros chegaría ao hat-trick cun gol no 49 e outro antes do pitido final, no 90. Tamén anotaría Yuki Nakata, botando por terra calquera esperanza de remontada das asturianas. O resultado final foi un 0-5.
O Interrías salva un punto pero perde o liderado
O líder tiña por diante o reto de vencer ao Real Oviedo B en casa para afianzar a súa presenza na posición de ascenso. Co Friol acechando, as de Luis Treviño tiñan que sumar si ou si nesta xornada.
Porén, o filial asturiano non lle puxo as cousas fáciles ás galegas. Ambos equipos mantiveron un man a man no inicio do partido, cun equilibrio que non rompeu ata o gol de Ana Menendez no minuto 20 para as visitantes.
O Interrías intentou a remontada, pero os seus esforzos non chegaban a porto e o descanso chegou con derrota para as galegas. Na segunda parte, as de Portonovo notaban a presión por puntuar, e seguiron presionando para rascar un punto. O premio chegou case sobre a bucina, cun gol no 89 de Alexandra Moreira. 1-1 e reparto de puntos que non beneficia ás galegas.
Revive aquí o duelo do Interrías e o Real Oviedo B.
O Sárdoma cae ante o Versalles CF
Nesta xornada, o Sárdoma sufriu unha derrota por un 3-2 ante o Versalles, e tivo unha ocasión perdida de botar madeira á loita polo ascenso.
As galegas víronse superadas polas asturianas, que golpearon primeiro con goles de Paula Núñez e Daniela González rondando a media hora de encontro. As visitantes respostaron con goles de María Calvar e Nerea Cruz despois da reanudación, para facer o 2-2.
Con todo, o Versalles logrou manter a cabeza fría e dominar o balón, para facer o terceiro e definitivo gol no minuto 75. O tanto de Ana Campoamor pechou o marcador, que xa non mundaría nos minutos restantes.
O derbi dos Victorias foi para as cebras
Xornada especial para os dous Victoria galegos. O coruñés e o compostelán citábanse no seu derbi, que rematou con vitoria para as primeiras por un 4-0.
As vermellas comezaron o partido con intensidade no campo da Grela, mantendo o esférico lonxe da súa gardameta Carmen Sumay. As cebras de Cris Oreiro loitaban por anotar, pero non lograban xerar ocasións claras de gol.
Así, non foi ata o minuto 40 cando un rexeite caeu nos pés de Andrea Díaz, quen viu a súa oportunidade para facer o 1-0. As compostelás loitaron polo empate, pero o descanso chegou sen cambios no marcador.
Na segunda parte, as coruñesas dominaron o partido. De novo Díaz non perdoou cando se viu ante a porta, asinando o segundo gol local. As vermellas moveron o banco para reaccionar, pero un novo erro na defensa deu a oportunidade para que as herculinas anotarn o terceiro, xa no minuto 80, obra de Candela Vázquez.
As visitantes buscaban o gol sen éxito, ante unha defensa das cebras que non deixaba espazos. Na outra área, as locais lograban facer o cuarto no 83, cun disparo de María Nogueira pola esquerda.
O filial branquiazul vence ante a UD Mos
Na zona media da táboa, o Dépor ABANCA B segue sumando puntos, cunha importante vitoria ante a UD Mos. Os dous equipos galegos citáronse en Abegondo, onde as coruñesas venceron por un 2-0.
As deportivistas lograron adiantarse cedo no marcador, ucn gol de Paula Novo no minuto 14. O UD Mos, que ve perigar a súa posición na categoría ao estar preto dos postos do descenso, non logrou transformar a urxencia en resultados, e as de Kevin Cabado dominaban o encontro.
Na segunda metade, o guion non mudou, e o Dépor ABANCA B repetiu gol, desta vez das botas doutra Paula, Monteagudo, xa no minuto 75. 2-0 e tres puntos para o filial.
Nova derrota do Villestro
Unha xornada máis, e xa van 19, o SD Villestro viuse superado polo seu rival. O conxunto enfrontábase ao Olímpico de León, que xogou como quixo na súa casa, rematando o partido nun 4-1.
As leonesas comezaron o encontro de cara, cun gol no minuto 2 de Aroa Caño. As visitantes lograrían manter a raia ás rivais durante boa parte da primeira metade, pero sen éxito nos ataques a vitoria seguía sendo do Olímpico.
Na segunda parte, as forzas fraquearon no bando galego, que vía como as locais volvían anotar pouco despois de saltar ao céspede, desta vez con gol no 46 de Emma Pérez. As leonesas seguiron anotando cun gol de Andrea Martínez no minuto 73 e o Villestro non reaccionaría ata case o final do duelo, cun gol da súa 7, Daniela Rivas.
Non contentas co resultado, as locais farían o cuarto gol no minuto 90, cun tanto de Nerea Redondo. As galegas non conseguiron puntuar en ningunha xornada, quedando relegadas á posición de colistas con 0 puntos.
O Umia CF imponse ao Gijón FF
O Umia CF sumou tres puntos na xornada que lle permiten seguir soñando na Primera Nacional. As galegas recibían ao Gijón FF, nun encontro que gañaron por un 4-0.
De principio a fin o partido foi das locais, que venceron cun dobre gol de Eva López, acertada no inicio e no final anotando no minuto 6 e no 90. Tamén golearon Nuria Torres no 65 e Natalia Sánchez no 72.
Con esta vitoria, as galegas escalan unha posición ata o quinto posto.
