O Peluquería Mixta Friol de Geluco Villar encara o segundo partido do ano viaxando a Vitoria. Enfronte, terá a un Alavés que está a completar unha gran campaña e sitúase na zona nobre da táboa.
As lucenses recuperan a varias xogadoras con respecto á xornada pasada, aínda que contarán coas dúbidas de última hora de Nati e Laura Gallego: “Para o partido contra o Alavés, recuperamos xente con respecto ao outro día en Madrid. Aínda así, temos as dúbidas de Nati e Laura Gallego que non sabemos se poderán viaxar. O traballo da semana foi bo e sumamos 3 adestramentos. As mozas están con confianza”, destaca o adestrador Geluco Villar durante a previa.
O xogo directo dos equipos vascos
O técnico galego falou da complexidade do encontro do vindeiro sábado polo estilo directo do equipo de Vitoria: “O Alavés é o típico equipo vasco que fai un fútbol directo e a nós pola nosa forma de xogar non nos beneficia nada. Nós tentaremos contrarrestalo co noso xogo combinativo, para que elas non teñan oportunidade de facer o seu. Ademais, creo que o balón parado tamén será un factor para ter en conta.
Geluco Villar, adestrador do Peluquería Mixta Friol: O Alavés é o típico equipo vasco que fai un fútbol directo e a nós pola nosa forma de xogar non nos beneficia nada. Nós tentaremos contrarrestalo co noso xogo combinativo
Nota positiva e negativa da derrota en Madrid
A derrota do pasado fin de semana en Madrid deixou ao Friol sen os tres puntos pero coa boa nova do debut de tres xogadoras do filial: “Debido ás baixas baixamos a Madrid con 4 xogadoras do filial. Foi unha pena porque o debut de María, Nerea e Andrea coincidiu co baixón físico da segunda parte. Ao só ter catro adestramentos en Nadal prexudicounos moito. O partido perdímolo na segunda parte porque o equipo estaba roto fisicamente e custounos moito. Por culpa desa falta de ritmo, o equipo cometeu erros e encaixamos os dous goles que nos custou o partido e volver de Madrid de baleiro. Aínda así, con 1-1 no marcador tivemos dúas ocasións ao pau que puideron cambiar o resultado”.
Geluco Villar, adestrador do Peluquería Mixta Friol: O partido perdímolo na segunda parte porque o equipo estaba roto fisicamente e custounos moito. Por culpa desa falta de ritmo, o equipo cometeu erros
