- O PM Friol, ascende como campión da Primeira Nacional Feminina
O equipo que adestra María Covadonga Regueiro, Covi, non deu espazo para a sorpresa -aos 24 minutos xa ían gañando por 3-0- e derrotou ao Olímpico de León por 5-2, cun hat trick da súa máxima artilleira, Alicia Martínez Quiles. Deste xeito, as lucenses volven a acadar un ascenso, nesta ocasión á Terceira División RFEF, e o título de campioas na Primeira División Nacional Feminina da RFEF.
O PM Friol, consciente do que se xogaba, saíu a pechar o partido canto antes e ao descanso xa gañaba por catro goles a cero. De nada serviu a vitoria a domicilio do Viajes InterRías FF fronte ao Real Sporting de Gijón SAD “B” por 0-3, aínda que as de Portonovo están a tan so un punto de lograr o seu obxectivo, a segunda praza na que poderían acompañar ao PM FRIOL. Haberá que esperar ata a fin de semana do 24 de abril, tras o descanso de Semana Santa, para coñecer como é este emocionante remate da Liga.
O festexo do PM Friol
As futbolistas do PM Friol festexaron o éxito coa afección e o club agradeceu públicamente o apoio de patrocinadores, colaboradores e masa social que “aportaron o seu gran de area para facer posible este ascenso”.
O 2º e 3º lugar están por decidir e Viajes InterRías e Sárdoma están na lea
O Oviedo Moderno CF “B” e o Sárdoma CF queren dar caza as de Portonovo, pero terían que gañar os seus partidos e esperar unha derrota do Viajes InterRías FF. No caso do Sárdoma CF, a tres puntos da segunda praza, ten gañado o golaverage, pero necesita dun tropezo inesperado do Viajes InterRías Fútbol Feminino e dunha vitoria a domicilio contra o Gijón Fútbol Femenino. E no caso do Oviedo Moderno, a dous puntos da praza que da acceso a Terceira RFEF, tería que gañar o seu partido e que as de Portonovo perderan en casa contra as asturianas do Versalles CF.
As ovetenses xogan contra as acabadas proclamadas campionas da categoría, co único incentivo de aumentar a súa casela goleadora, e sobre todo para axudar a Alicia Martínez para acadar o pichichi. As lucenses, por tanto, acadan o campionato e acceden de xeito automático a futura Terceira División RFEF, unha nova categoría do fútbol feminino, composta por vinte equipos, que acollerá aos dous mellores conxuntos máis os seis mellores terceiros da cada grupo da Primeira Nacional Feminina da Real Federación Española de Fútbol.
Como hai sete grupos na actual competición haberá un deles nos que o terceiro equipo da táboa clasificatoria non acadará o ansiado ascenso. Isto fai que os clubs: Sardoma Club Fútbol, Oviedo Moderno CF “B” e o Viajes InterRías disputen con intensidade a segunda praza. Un posto que dá acceso directo ao ascenso, e unha terceira praza que podería, dependendo dos outros grupos, ser un billete para a xogar o vindeiro curso na Terceira RFEF.
Polo que respecta ao descenso, o Victoria FC de Santiago gañou o seu partido por 0-6 e acortou distancias co Sporting de Gijón B, que perdeu en casa contra o Viajes InterRías. Agora, tras a vitoria das santiaguesas a salvación está nun so punto.
No caso do Victoria FC xoga contra o Mós na súa casa, en Santa Isabel. E o Sporting de Gijón SAD B desprazarase ata León para disputar o seu partido contra o CD Olímpico de León. Os encontros do Victoria CF e Villestro, e do Deportivo ABANCA Bcontra o Umia CFserán irrelevantes desde o punto de vista práctico, aínda que está en xogo a quinta praza.
