“Este é o camiño”. Unha frase que puxo de moda Pedro Pascal en The Mandalorian e coa que Geluco, presidente do Peluquería Mixta Friol, resumiu o encontro desta tarde entre as lucenses e o valisoletano CD Parquesol. As matemáticas séguenlle dando posibilidades de evitar os play offs polo descenso logo de colleitar os tres primeiros puntos do ano.
Iso si, custou. E moito. José Manuel Ponfe sentouse no banco de adestrador por primeira vez cun cadro de xogadoras incompleto. Apenas 12 días para tomar contacto con elas e uns cantos adestramentos menos. E así saltaron á Reigosa.
O golpe de motivación inicial tivo efectos inmediatos no marcador. Fanny correu pola banda esquerda a bateu cun tiro cruzado á gardameta do Parquesol. Só pasaran seis minutos desde o saque inaugural e o Friol xa ía por diante.
A partir de aí reinou o xogo trabado, sen demasiadas oportunidades nin para un, nin para o outro equipo. Puido, iso si, incrementar a súa vantaxe o conxunto local pouco despois da media hora de xogo. Unha falta botada desde o costado dereito rematou coa defensa laranxa sacando o balón baixo paus. Así e todo, ambos os dous equipos enfilaron os vestiarios cun resultado aberto.
Final feliz para o Friol nun partido sufrido
A segunda parte prometía un arranque moito máis desfavorable para o Friol. Porén, nunha boa combinación entre Lucía Pardo e Nere chegou o segundo tanto para as de Geluco e Ponfe. Esta última, de disparo seco, raso e á esquerda da portería, trouxo certa tranquilidade ao cadro local.
Non obstante, o resto do partido non foi un camiño de rosas para que os tres puntos quedaran na casa. Coa relaxación chegou o gol do Parquesol, con aínda 27 minutos por diante e toda a intención de igualar o encontro. Non quixo saber nada diso o Friol, que dedicou o tempo restante a aguantar.
E así, sufrindo, pero con alegría, as lucenses lograron a súa primeira vitoria do ano. Suman na táboa oito puntos que aínda as manteñen vivas na loita por escapar dos postos de play off de descenso. Quedan catro partidos de liga regular por diante. Quedan catro finais.
Final del partido en A Reigosa. Reto superado!!! La primera victoria del año llegó y los primeros tres puntos se quedan en casa!! PMFRIOL 2 – @CDParquesolFem pic.twitter.com/HTDk8HU2mH
— PMFRIOL (@pmfriol) January 24, 2021
