O salón de actos da Fundación Paideia acolleu esta tarde a segunda charla do III Foro Pensando en Educación, unha iniciativa promovida polo Concello da Coruña a través da área municipal de Educación e que, nesta edición, está a reunir a voces femininas de gran relevancia nos seus respectivos campos profesionais.
Se a finais de febreiro, na primeira charla do ciclo, as protagonistas foron as Tanxugueiras, hoxe foi a quenda de dúas deportistas. Sofía Toro, deportista coruñesa é campioa olímpica, mundial e europea de vela, e actual xerente do Clúster Galego da Industria do Deporte e o Benestar; e a futbolista Raquel García Yagüe, que se desempeña como defensa central nas ringleiras do Dépor ABANCA.
No coloquio, que comezou ás 19.30 horas nunha sesión que foi de acceso libre, Sofía Toro e Raquel García Yagüe abordaron polo miúdo as cuestións vencelladas á educación fronte aos retos da muller no deporte. A sesión foi moderada pola xornalita Isabel Bravo.
Próxima quenda do Foro Pensando en Educación
O III Foro Pensando en Educación continuará o vindeiro día 27 de abril, coa participación das actrices galegas Isabel Blanco e Mariana Carballal. Na que será a terceira das charlas previstas nesta edición do foro. Blanco e Carballal achegarán a súa perspectiva sobre ‘A educación fronte aos retos da muller no mundo do teatro, cine e interpretación’.
A charla será moderada pola xornalista Lara Vivero e terá lugar entre as 19.30 e 21.00 horas, tamén no salón de actos da Fundación Paideia.
