A Confederación de Empresarios de Pontevedra, en Vigo, acolleu este martes o Foro “Sustentabilidade en instalacións deportivas”, unha xornada impulsada polo Clúster Galego da Industria do Deporte e o Benestar e AGEINCO co obxectivo de xerar un espazo de encontro entre profesionais, entidades deportivas, administracións públicas e expertos en sustentabilidade para compartir coñecemento, identificar boas prácticas e impulsar solucións innovadoras para o sector.
A cita enmárcase dentro das accións do Plan Estratéxico 2024-2028 do Clúster e conta co financiamento do IGAPE a través da convocatoria de axudas ás agrupacións empresariais innovadoras de Galicia.
A apertura institucional contou coa participación de Pedro Iglesias, presidente do Clúster Galego da Industria do Deporte e o Benestar e de Javier Alonso, presidente da Asociación Clúster de Empresas de Enxeñaría, Consultoría e Servizos Tecnolóxicos de Galicia (AGEINCO), que destacaron a importancia de avanzar cara a modelos de xestión máis eficientes, sostibles e innovadores nas infraestruturas deportivas.
Durante a primeira parte da xornada déronse a coñecer as conclusións do “Libro Branco da eficiencia enerxética en centros deportivos”, elaborado por AGEINCO en colaboración co Clúster do Deporte. A presentación correu a cargo de Daniel Prieto, CEO de Soltec Ingenieros, quen destacou a necesidade de optimizar o consumo enerxético e avanzar cara a instalacións máis eficientes e sostibles, que beneficien tanto aos seus usuarios e usuarias como ao persoal xestor.
Así mesmo, puxo énfase nas amplas posibilidades que a intelixencia artificial ofrece aos establecementos deportivos para mellorar o seu funcionamento e adoptar unha xestión máis eficiente.
A continuación presentouse oficialmente RIDEGA, o Rexistro de Instalacións Deportivas de Galicia, unha plataforma impulsada pola Xunta de Galicia e presentada por Miguel Rodríguez, técnico da administración autonómica. Esta ferramenta permitirá dispoñer dunha visión actualizada e estruturada das infraestruturas deportivas galegas, facilitando a planificación, análise e mellora da súa xestión.
A xornada concluíu cunha mesa redonda sobre sustentabilidade en instalacións deportivas, na que participaron Jesús Irisarri, arquitecto encargado da Cidade Deportiva Afouteza; Carlos Cao, do RC Celta de Vigo; e Julio Calderón, de Calderón & Asociados Turf Managers.
Temáticas tratadas neste foro de sustentabilidade
Durante a charla abordáronse os principais retos do sector en materia de eficiencia enerxética, mantemento sostible, innovación tecnolóxica e adaptación das infraestruturas deportivas ás novas normativas en proceso de implantación. Ademais, reflexionouse sobre a necesidade de profundizar na sustenibilidade financeira das melloras que están a implantarse, así como na sua durabilidade a longo prazo.
O foro reuniu representantes de empresas, entidades deportivas, profesionais da enxeñaría e axentes vinculados aos sectores do deporte, o benestar, a construción e os servizos tecnolóxicos, posicionándose como un punto de encontro para fomentar a competitividade empresarial a través da sustentabilidade e da innovación, segundo informan desde o equipo de comunicación do Clúster Galego da Industria do Deporte e o Benestar.
