O Campionato Galego de Natación Absluto de Inverno chega por primeira vez na historia a Lugo. A cita, que reunirá aos mellores nadadores e nadadoras de Galicia, terá ao CN Fluvial de Lugo como anfitrión os próximos 28, 29 e 30 de decembro.
Este luns 20 presentouse a competición nas instalacións do club do barrio da Ponte, nun acto no que estiveron presentes o presidente da Federación Galega de Natación, Carlos Touriño González; o Delegado da Xunta de Galicia en Lugo, Javier Arias; o Concelleiro de Deporte e Xuventude, Mauricio Repetto; e o presidente do Club Fluvial, Tito Valledor.
Alí, Valledor expresou a súa preocupación pola evolución da situación epidemiolóxica, que variará os plans inicialmente establecidos para a competición: “É unha verdadera mágoa que o público non poida desfrutar por primeira vez na historia da cidade dunha competición de tanto nivel, pero o sentido da responsabilidade prevalece nestes casos. Se demostramos a nosa gran capacidade organizativa, teremos máis oportunidades de volver a ser anfitrións”.
Adaptación a tempos de COVID
Tras unha reunión o pasado xoves, a Comisión Delegada da FEGAN decidiu que o formato elixido para a disputa da mesma sexa o de series contra o reloxo, do mesmo xeito que a tempada pasada. Non se dará, por tanto, a tradicional dinámica de eliminatorias e finais.
Mediante este sistema, que separa a competición feminina e a masculina, con tres sesións para cada unha, búscase reducir os contactos entre os 247 nadadores rexistrados e á vez minorar as opcións de posibles contagios. Por tal motivo, o Campionato Galego de Natación Absoluto de inverno que organiza o CN Fluvial, disputarase a porta pechada.
Isto non significa que os afeccionados e afeccionadas que queiran gozar da competición non poidan facelo, xa que terán á súa disposición o streaming oficial para poder ver en directo todas as series.
Desde a dirección técnica do club tamén existen grandes expectativas nas marcas que se poidan lograr na cita, xa que a piscina lucense estrea para a ocasión novos poyetes de saída con taco que permiten gañar tempo notablemente respecto aos tradicionais.
O equipo anfitrión
A representación do equipo anfitrión estará composta por 17 nadadores e nadadoras entre os que destacan Borja Álvarez, Martin Pardo, *Ánder Gómez, Diego Martínez, Ana Busto, Ana Cernadas e Fany Pose. O equipo masculino do Club Fluvial defende ademais o título que lograron o pasado mes de xullo na edición celebrada en Ourense.
