Xogar en casa non xurdiu efecto para a AD Cortegada a pasada fin de semana. As galegas acumularon dúas derrotas o sábado e o domingo, nos seus partidos contra o Azkoitia Azpeitia ISB e o HGB Ausarta Barakaldo, enmarcados na décima e undécima xornada da Liga Feminina 2.
Na primeira ocasión, o sábado, 5 de decembro, o Cortegada recibía a un Azpeitia forte na competición. O cadro visitante foi finalmente superior, nun duelo que rematou cun 51-67 no marcador.
O Cortegada asinou uns primeiros minutos moi prometedores, con acerto fronte á canastra, e forte en defensa, logrando levarse o primeiro tempo por unha diferenza mínima dun punto. Pero todo cambiou a partir do segundo cuarto. As visitantes colleron o mando do partido e imposibilitaron o xogo local. Ao descanso, o electrónico marcaba xa a remontada, cun 34 – 41.
A distancia aumentou na segunda parte. Á volta de vestiarios, o cadro de Rubén Domínguez non era quen de atacar e logrou soamente sumar seis puntos nun terceiro cuarto no que o Azpeitia asinou 14. Con todo, para os últimos dez minutos as galegas presionaron e case logran o empate do derradeiro cuarto. Os esforzos non foron suficientes para remontar e a vitoria escapóuselles das mans.
A segunda derrota da fin de semana chegou co Barakaldo
O relato tampouco cambiou moito ao día seguinte. De novo en casa, o Cortegada enfrontábase ao Barakaldo, outro rival forte da parte superior da clasificación. O cadro vasco chegaba dunha vitoria contra o Arxil do sábado, e logrou o pleno de vitorias en Galicia.
O equipo visitante asinou un 60-71 que setenciaba ao cadro local á quinta derrota consecutiva. O partido foi dominado por completo polo Barakaldo, con algúns esforzos das galegas por achegarse ao empate.
A primeira parte foi para o equipo visitante, que continuou coas boas enerxías do partido do día anterior. Cunha Ijeoma Uchendu e unha Ariana Lewis moi acertadas en ataque, o Barakaldo adiantábase no marcador con facilidade. Entre as dúas, lograron sumar máis da metade dos tantos visitantes e o Cortegada non foi quen de paralas.
Á volta do descanso o equipo de Vilagarcía colleu forza e levouse o terceiro cuarto pero, cun 47-54, a remontada para os últimos minutos prevíase moi difícil. Finalmente, non puido ser, o cunha diferenza final de 11 puntos, o conxunto de Domínguez sumou a segunda derrota na casa.
Sara Gómez, a xogadora mellor valorada da AD Cortegada
Malia os dous duelos perdidos, unha xogadora destacou entre o resto dentro do cadro local. Foi Sara Gómez, que acadou unha valoración de 13 puntos contra o Azpeitia e de 17 contra o Barakaldo. Entre ambos encontros, asinou 32 tantos para o seu equipo e nove rebotes.
Tamén estiveron moi acertadas, aínda que non o suficiente para a vitoria, Tereza Sedlakova, con 11 puntos no primeiro partido e oito no segundo e Cristina Loureiro e Teodora Saric con 13 entre ambas citas e Patricia Vicente, cun total de 18.
A AD Cortega é o equipo con peor racha
Estas dúas derrotas tras dez partidos, que se suman ás seis recibidas en encontros anteriores, deixan un balance moi negativo para o equipo arousán. Aínda que non ocupan a última posición, están soamente a dous puntos dela, e cun ou dous partidos máis que o resto de equipos da parte inferior da táboa.
Unha racha de cinco derrotas consecutivas (igualada á do Arxil) dificulta moito a permanencia do Cortegada nunha Liga moi competitiva e igualada. A seguinte oportunidade será contra o Magec Tías, actual colista, o sábado, 12 de decembro, ás 17:30 horas.
https://asnosas.gal/suspendidas-citas-de-lf2-do-rosalia-e-arxil-co-magec
Un falso positivo detectado no conxunto canario obrigou a adiar dous dos seus últimos partidos (contra o Rosalía e o Arxil). Finalmente, ao confirmarse o negativo da xogadora que dera positivo en COVID-19, o encontro contra o Cortegada disputarase segundo o previsto.
