Último partido e despedida con vitoria para o HC Borbolla, que remataba o curso 2020-21 ante o seu público impoñéndose 3-2 ante o CP Vilanova.
Adeus agridoce a unha tempada na que o bloque medrou moitísimo e mellorou o seu xogo pero non foi quen de certificar a súa permanencia na elite. E adeus dobre, xa que unha das xogadoras insignia do club, Julia Cabanas, despedíase do equipo e, posiblemente da práctica competitiva do hoquei do que di vai “tomarse un descanso”. A galega foise pola porta grande, anotando o gol do trunfo das tomatitas.
Con todo decidido, o HC Borbolla que adestra Santi Martínez, saltou á cancha disposto a demostrar que, neste momento de competición, o seu nivel de xogo é digno da elite estatal do hoquei rodado, aínda que a adaptación das xogadoras á categoría ao inicio de tempada lastrase o seu concurso na Ok Liga.
Tiveron que remontar
As coruñesas iniciaron o partido perdendo cun gol anotado polas catalás nos primeiros minutos do partido. A autora do gol foi Marina Asensi. Poucos minutos despois igualaba o encontro para as tomatitas Lucía Yáñez (1-1). A 20 segundos do final do primeiro período, Antía Rivadas colocaba por diante no luminoso de Monte Alto ás coruñesas e o HC Borbolla patinaba cara aos vestiarios cun 2-1 ao seu favor.
Á volta do descanso, María Córdoba anotaba de penalti batendo a Fernanda Tapia e devolvendo a igualada ao marcador. Tivo outra ocasión, desde o punto fatídico, pero esa vez, a cancerbeira chilena do HC Borbolla gañoulle a partida.
Do 2-2 desaproveitou o conxunto galego un penalti que Julia Cabanas no transformaba. Pero a propia xogadora herculina, dous minutos despois, era a que puña o 3-2 no marcador, asinando así o gol do trunfo para o Borbolla. A menos de cinco minutos para o final, Fernanda Muñoz tivo unha falta directa pero non foi quen de bater a Julia Baldrich.
A despedida de Julia Cabanas: “Voume entre bágoas”
Este último partido de liga do HC Borbolla era tamén unha despedida para Julia Cabanas, unha xogadora que defendeu a elástica das tomatitas nos últimos dez anos e deixa a competición no hoquei, pero “non as pachangas”, tal e como ela mesma confesaba entre bágoas ante as cámaras de Hockey Global ao final do partido nunha entrevista a pé de pista.
“Son moitísimas emocións. Voume triste por non poder deixar o equipo arriba. É o meu último partido, polo menos co Borbolla, quero tomarme un descanso de hoquei, non se se seguirei ou non, pero en principio queda aquí”, declaraba a xogadora aos micrófonos de HG.
As súas palabras estaban cheas de emoción e agradecementos “hoxe sáeme dar grazas a todo o mundo que apoia ao hoquei feminino. Oxalá todo o mundo xogase 24 anos como xoguei eu. Voume moi emocionada por que é o club no que xoguei os últimos 10 anos, no que me fixen maior, no que crecín moitísimo. Este ano aprendín moitísimo das pequenas. Deséxolles o mellor. Que crezan individualmente e como equipo. Oxalá consigan manterse grazas a Prata e se non é este ano, será o seguinte”, dicía Julia Cabanas.
Nas súas palabras tamén unha proposta para as nenas/os que estén pensando en dar ou non os seus primeiros pasos no hoquei a patíns. “O hoquei ofreceume unha chea de cousas. A quen estea a pensar en empezar anímolle a que o probe, engancha. Eu voume entre bágoas”, argumentaba a patinadora do HC Borbolla.
Revive aquí o partido entre HC Borbolla e CP Vilanova a través de Hockey Global.
FICHA TÉCNICA
HC BORBOLLA: Fernanda Tapia, Julia Cabanas, Lara Yáñez, Fernanda Muñoz e Lucía Yáñez – quinteto inicial -. Tamén xogaron: Antía Rivadas, Alba Díaz (C), Marta Vilas, Beatriz Varzeas. Edén Avecilla (P.S.)
CP VILANOVA: Julia Baldrich, Paula García Delgado, MArina Asensi, Aina Martínez e Paola Pascual – quinteto inicial -. Tamén xogaron: Blancan Angrill, Paula Molina, Laura Manzanares e María Córdoba Junca. María Briva (P.S.)
GOLES: 0-1 Marina Asensi. 1-1 Lucía Yáñez. 2-1 Antía Rivadas. 2-2 María Córdoba Junca. 3-2 Julia Cabanas.
ÁRBITROS: Luis Mier Sánchez e Carlos Chouciño Fernández. Amosou cartón azul á local Alba Díaz, así como á xogadora visitante Laura Manzanares. Ambos os dous cartóns amosados no mo minuto final de partido.
INCIDENCIAS: Partido correspondente á xornada oitaba do Grupo D da Ok Liga feminina, no que os equipos clasificados na primeira fase do 9º ao 16º posto, loitan pola permanencia. O encontro tivo lugar no Pavillón Polideportivo de Monte Alto na Coruña.
