A piscina de Agrupació Esportiva Santa Eulalia (L´Hospitalet de Llobregat) será o escenario do próximo partido do equipo feminino do CW Pontevedra. Será hoxe, sábado 3 de decembro, coa disputa da xornada 7ª, a última da primeira volta da primeira fase de Primeira Nacional Feminina. O rival que terán enfronte as galegas será o conxunto do AESE. Con este partido, o equipo pontevedrés xa se tería medido a todos os rivais do seu grupo. O partido comezará ás 16:00 h, e poderá seguirse minuto a minuto na web da RFEN.
O equipo catalán ocupa a cuarta posición, con 3 vitorias e 3 derrotas, e só un punto máis que o CW Pontevedra (6º). Nunha liga na que as vitorias valen 2 puntos e as derrotas 1, e sen opción a empates, todos os equipos están moi apertados na táboa clasificatoria e calquera partido será decisivo para a clasificación final.
As do Lérez viaxarán unha vez máis sen complexos e dispostas a baleirarse na piscina para conseguir a súa primeira vitoria a domicilio, sabendo que non será fácil, xa que enfronte terán un rival moi competitivo e con experiencia.
Intensa xornada de domingo na liga galega
O CW Pontevedra disputa tres partidos de Ligas Galegas fronte ao CW Coruña Rías Altas. Mañá, domingo 4 de decembro, o Club Waterpolo Pontevedra desprázase a Coruña (Piscina San Diego) para disputar 3 partidos das ligas Galegas de Waterpolo fronte ao CW Coruña Rías Altas.
Ás 16:20 h comezará o primeiro partido, o de Liga Galega Cadete Mixta, onde os do Lérez buscarán unha vitoria fronte a un rival directo na loita polas primeiras posicións da clasificación.
Tras os cadetes, ás 17:40 xogará o equipo alevín feminino do CW Pontevedra en Liga Galega Alevín Mixta. Tras conseguir a súa primeira vitoria a semana pasada, as mozas pontevedresas chegan con moita moral a este partido para seguir sumando experiencia. En fronte terán a un equipo que aínda debutará esta tempada.
Por último, ás 18:50 h comezará o partido de Liga Galega Absoluta Feminina, onde o equipo “B” do CW Pontevedra participa co obxectivo de que as súas xogadoras máis novas sigan gañando minutos de experiencia para xogar en Nacional. O equipo formado polas mozas de Pontevedra e Ourense xogará a súa terceira xornada e pelexarán pola súa terceira vitoria.
