O soño do Celta Zorka Recalvi de ascender á Liga Feminina Endesa queda niso, un soño. As celestes despiden unha gran tempada cunha derrota ante o Pacisa Alcobendas. O cadro madrileño foi superior e xusto vencedor ante as celestes, deixando ás galegas ás portas do play off de ascenso (64-51).
Con este resultado e tras a derrota co Barça, o conxunto dirixido por Cristina Cantero deberá agardar a unha cuarta oportunidade a próxima tempada para intentar ser equipo de LF Endesa. O Celta finaliza a tempada entre a 9ª e 12ª posición final. O próximo curso militará na Liga-2 PRO, formada por 16 equipos, unha nova categoría, única a nivel estatal.
“Gustaríame ter competido mellor”, admitía a destradora, Cristina Cantero. Porén, mostrouse moi orgullosa da tempada das súas pupilas e quédase co obxectivo acadado para o club de estar nesta fase de ascenso e formar parte o seguinte curso da Liga PRO.
O Celta comezou o encontro con opcións
Coa baixa de Noa Comesaña, lesionada no anterior duelo da Fase Final, o Celta saltou á pista de Leganés con Mariona Martín, Celia García, Rose Marie Julien, Maja Stamenkovic e Marita Davydova como quinteto titular. Grazas a Julien, as galegas comezaron dominando o encontro, cun parcial 4-7 ao seu favor.
Porén, pronto o nivel do partido igualouse entre ambos bandos, con Celia Menénfez controlando o xogo madrileño, rozando ás celestes, que vencían no primeiro cuarto por só un punto (17-18).
No segundo tempo, Motley sumaba o seu noveno punto consecutivo, sendo a estrela das accións ofensivas do Celta. Xunto con ela, Davydova aumentaba os puntos vigueses nun man a man coa interior Daira Varas. A pívot do Alcobendas era unha ameaza constante para a defensa das galegas, que chegaron ao descanso xa por detrás, pero con posibilidades de remontada (35-32).
O Alcobendas decantou o partido no terceiro cuarto
Tras o paso por vestiarios, o Celta saiu renovado con Julien de novo na cancha. Desta forma, as de Cantero lograron colocarse por diante por unha lixeira vantaxe (39-41). Con todo, as faltas persoais facía que as oportunidades das madrileñas desde o tiro libre creceran. Desta forma, cunha Celia Menéndez sen fallos en ataque, o Alcobendas logrou xerar un colchón de seis puntos coas celestes.
A adestradora do cadro galego, Cristina Cantero, viuse obrigada entón a parar o reloxo, tomando a decisión de subir as liñas defensivas e probando o cambio a zona. Porén, o Alcobendas soubo adaptarse a estas transformacións e puxo o 56-45 a falta de 10 minutos para o pitido final.
Cos ánimos e as enerxías xa baixas, o Celta quedou noqueado no partido. O cuarto final destacou pola sequía baixo aro dos dous equipos, cun Alcobendas asentado nunha importante vantaxe, mentres que as celestes non atopaban o seu xogo. Os seis puntos das galegas neste último tempo chegaron da man de Davydova, mentres que os 8 das madrileñas se repartiron entre varias xogadoras. As galegas seguiron empurrando ata o final, cunha intensidade que rematou na lesión de Celia García.
Co marcador xa no 64-51, rematou a aventura celeste coa vista posta na máxima categoría do baloncesto español.
A valoración de Cristina Cantero
“Foi un partido moi difícil, moi difícil para nós. Creo que elas foron superiores e equilibradas. Foi un grupo de moito nivel e mañá verase un partido moi bonito”, declarou a adestradora, en relación ao encontro que enfrontará a Alcobendas e Barça.
Como explicación ao nivel dado polo Celta neste segundo partido da Fase Final, Cantero valorou que “non chegaron nin as forzas nin a cabeza para este partido, xogamos ao ritmo que elas querían”. Un ritmo nada favorecedor para as viguesas, que intentaron “subir liñas e apretar un pouco máis”, pero non foron quen de impoñer o seu estilo de xogo.
Como valoración xeral da tempada, Cantero quédase con ter competido moi ben nun curso “moi difícil”, e ter conseguido o obxectivo do club de ser equipo de Liga PRO e disputar a fase de ascenso. Sobre esta mesma fase, declarou que “gustaríame ter sido máis guerreiras sobre todo no partido de hoxe. Gustaríame ter chegado ao domingo, pero a seguir”. Porén, reclacou o traballo das súas xogadoras e asegurou estar “moi ogullosa do plantel e do club”.
🎥 La valoración de @Canteroostos #VigoCidadeFermosa#FaseFinalLF2#RSProvideo pic.twitter.com/1a7QNXjyIM
— CELTA BALONCESTO 💙 (@Celtabaloncesto) April 10, 2021
Os nomes propios do Celta – Alcobendas
No conxunto local, a xogadora con máis acerto fronte ao aro foi unha incansable Celia Menéndez, autora de 21 puntos. Seguiuna con 13 Daira Varas e cos mesmos puntos Aguilar. Nas filas madrileñas tamén competía unha galega, a coruñesa Paloma Dorda.
No bando celeste, debutaron nesta fase de ascenso Clara Prieto, Florencia Niski e Sara Vidal e sobre a pista de Leganés as máis acertadas foron Julien, con 12 puntos e Davydova, con 8.
A galería do partido
FICHA TÉCNICA
64) PACISA ALCOBENDAS: Lucia Togores (9), Celia Menéndez (21), Rachel Howard (10), Clara Rodríguez (4) e Daira Varas (13) – quinteto inicial -. Tamén xogaron: Sara Francisco (0), Lucía Gutiérrez (1), Cecilia Aldecoa (0), Paula Justel (3), Paloma Dorda (3), Inés Mata (0). Rueda (6), Guerrero (5), Aguilar (13), Fequiere (8), Anducar (-), López (4) e Reus (-).
51) CELTA ZORKA RECALVI: Mariona Martín (2), Celia García (5), Rose Marie Julien (12), Maja Stamenkovic (5) e Marita Davydova (8) – quinteto inicial -. Tamén xogaron: Ainhoa Lacorzana (0), Lucía Fontela (0), Florencia Niski (0), Clara Prieto (0), Angela Coello (2), Sara Vidal (0) e Adrienne Motley (17).
PARCIAIS: 17-18, 18-14, 21-13 e 8-6.
ÁRBITROS: Joan Fanes Marginet y Sara Pastrana González. Sinalaron 15 faltas a Pacisa Alcobendas e 18 a Celta Zorka Recalvi..
INCIDENCIAS: Partido correspondente á segunda xornada da Fase Final da Liga Feminina 2, disputado no pavillón Europa en Leganés ante 300 persoas.
