Durante a fin de semana, a Copa de España de ciclocrós celebrou unha dobre cita en Euskadi coa galega María Filgueiras (Río Miera) participou en Llodio (C1) como en Karrantza (C2) e fíxose co triunfo nas cadetes e apuntalou o seu liderado no certame estatal.
A competición, que tamén puxo en xogo puntos UCI, contou con outra galega máis no podio. Eva Ortega (Biciosos-Rías Baixas) asinou un dos seis podios másters que acadaron os representantes galegos sobre o barro vasco.
Dobre triunfo de María Filgueiras
En dous escenarios moi enlamados, María Filgueiras estivo intratable. Lucindo a camisola da Copa de España, que se vestiu na apertura do certame en Pontevedra, a corredora do Río Miera abriu a fin de semana impoñéndose no XXXIII Ciclocross Internacional de Llodio por 1:42 de diferenza respecto a Leyre Almena (Teika).
Esa orde no podio repetiuse no XXVIII Ciclocross Internacional Karrantza coa de Betanzos gañando por unha marxe de 52″. Moi preto do podio do domingo quedou Aroa Otero (Avanza-O Porriño), cuarta no circuíto biscaíño.
Vitoria de Ortega
Tamén en categoría máster deuse mostra do talento das ciclocrosistas galegas. A máster-30 Eva Ortega apuntouse a vitoria no seu grupo de idade en Llodio. A do Biciosos-Rías Baixas rematou entres dúas máster-40: a 9″ de Ruth Moll (Oviedo.es) e superando por 25″ á galega Marina González (Illas Cíes).
Ao día seguinte quen pugnou con Moll polo triunfo absoluto foi González, cruzando a liña de meta a 12″ da asturiana e conservando o maillot de líder. Ortega concluíu cuarta en Karrantza, por detrás da gañadora máster-30 Carolina Juárez (Mister Biker), e segue á fronte da xeral da súa categoría.
Máis resultados galegos
A colleita de podios do ciclocrós galego completárona os máster-40. José Rodríguez ‘Tami’ (Norinver) obtivo o segundo posto e asaltou o liderado en Llodio, nunha carreira que se anotou Raúl Ballester (Mister Biker) e na que o cambrés Andrés Calvete (Monte Xalo) terminou quinto. O primeiro posto no ranking duroulle 24 horas ao porriñés, quinto na proba do domingo. O podio galego en Karrantza conseguiuno Calvete, terceiro por detrás do portugués Rogerio Matos, que recuperou o liderado, e do vencedor Isaac Suárez (Nesta).
Dentro dos tops 10, destacaron as galegas Vania Gregores (Ponteareas), novena en júnior e Sofía Álvarez (Cambre) cun quinto posto en Karrantza e ademais, Irene Trabazo (XSM) pechou a fin de semana sendo 11ª nas elites.
O díptico vasco deixou outros resultados sobranceiros da representación galega. En Llodio, o júnior Iván Fernández (Vigo-Rías Baixas) clasificouse oitavo e o máster-50 Óscar González (Máis Que Bicis), décimo.
Á lista dos top-10 sumouse Óscar González mellorou respecto ao día anterior e ocupou a sexta praza júnior. Ademais, nesta última cita, Samuel González (Máis Que Bicis) foi 12º nos elites, mesma posición que ocupou Anxo Carril (Coruxo) nos sub23.
A cuarta xornada da Copa de España de ciclocrós terá lugar o 21 de novembro en Alcobendas (Comunidad de Madrid).
