As novas medidas tomadas pola Xunta en materia de deporte ante o aumento dos casos de COVID-19 están a provocar o descontento de distintas federacións. A última en pronunciarse foi a Federación Galega de Balonmán, que considera a decisión de paralizar o deporte federado autonómico como “inxusta, xa que non está motivada en datos de contaxios”.
A organización recorda que “no balonmán galego non houbo contaxios e por iso consideramos que é unha medida inxustificada, pero tamén anunciamos que, unha vez máis, imos dar exemplo e acatar á decisión da autoridade sanitaria e cumprir as normas de forma escrupulosa”.
Federación Galega de Balonmán: “Anunciamos que, unha vez máis, imos dar exemplo e acatar á decisión da autoridade sanitaria e cumprir as normas de forma escrupulosa”
Desde a Federación móstranse críticos coa xestión autonómica, e declaran que “imos facer iso que lle pedimos e esiximos ás autoridades: Responsabilidade e solidariedade nunha situación moi complicada a nivel sanitario”.
“Non nos imos render”, di a Federación Galega de Balonmán
Así mesmo, no escrito, a Federación Galega de Balonmán dedícalle unhas palabras ás persoas que conforman este deporte. “Coñecemos o esforzo que realizastes todos e todas para volver á competición, como os esforzastes en cumprir os protocolos e é moito o orgullo que sentimos polo comportamento da familia do balonmán galego durante a pandemia. Outra vez tócanos dar exemplo e cumprir as normas para, entre todos, frear esta onda de contaxios que non deixa de medrar”
Federación Galega de Balonmán: “Despois dunhas horas moi duras intentando asimilar unhas medidas inxustas e inmerecidas, poñémonos en modo traballo e xa estamos na busca de solucións”
O comunicado finaliza cunha mensaxe clara: “non nos imos render”. A entidade segue traballando coa mente posta na reactivación da actividade deportiva e do deporte federado.
“Despois dunhas horas moi duras intentando asimilar unhas medidas inxustas e inmerecidas, poñémonos en modo traballo e xa estamos na busca de solucións para regresar coa forza que nos representa”, afirman desde a Federación Galega de Balonmán.
UFEDEGA: “Cremos firmemente que o deporte é parte da solución”
