Sete meses despois do último partido de liga 2019-2020, e cun título de liga polo medio alcanzado en Málaga, as Guerreiras Laranxas regresaron a Vista Alegre con festival de goles no amigable de pretempada ante o Castro FSF (8-0), de Segunda División.
O Pescados Rubén Burela ofreceu unha clara superioridade e máis rodaxe, xerando inmensidade de ocasións, fronte a un rival, que aínda que non dispuxo de posesión, si amosou orde dende a defensa e valentía na tentativa de saídas, sen deixar de pelexar nunca.
Cristina foi a encargada de abrir o marcador xa no minuto 5. As filas dasa de Castro de Rei xa sacaran baixo paus un balón de Bea Mateos; Lara Balseiro tamén puxera moito perigo dende recuperación de Dany.
Pouco a pouco e con paciencia, as da Mariña conseguiron multiplicar o perigo; Elena Aragón, no 11, asistida por Ale de Paz, e Lara Balseiro, no 17 e cazando o rexeite de Dany, ampliaron a renda ao descanso.
Regresou con moito acerto o Pescados Rubén, con protagonismo dobre de Elena Aragón, no 22, na busca do pase, que tocou en Andrea, e o 23, finalizando unha boa saída de Bea Mateos, a pase de Jenny.
Quixo o Castro FSF sorprender a Sandra Buzón cunha galopada e un disparo raso que se foi por pouco; non tivo máis opcións, aínda que non deixou de pelexar.
De novo as de Julio Delgado aproveitaron a súa oportunidade, no 24, cunha incursión de Cami, que recolleu Jenny para o 6-0, despois de repelelo o pau. Ale de Paz continuou coa avalancha no 25, asistida por Lara Balseiro.
Cristina asinou o e puxo o punto final ao festival goleador cun 8-0 antes de ecuador da segunda parte. O noveno quitouno Elena Aragón ao segundo pau no 36 e pouco despois a propia Uxía, sacando unha boa man ante Cilene. A meta do Castro FSF volveu ter unha excelente resposta ante Leti. O equipo visitante tirou de orgullo e coraxe para frear as continuas embestidas das filas laranxas sen tregua especialmente tras o descanso.
Copa Galicia, o sábado co Amarelle
As pupilas de Julio Delgado e Lucas regresarán xa o sábado a Vista Alegre, coa volta de semifinais de XIV Copa Galicia ante Viaxes Amarelle (19.00 horas, TVG2).
FICHA TÉCNICA
PESCADOS RUBÉN BURELA FS: Sandra Buzón, Cristina, Cami, Jenny, Bea Mateos – quinteto inicial – tamén xogaron Dany, Cilene, Lara Balseiro, M. Cortés, Elena Aragón, Ale de Paz e Jozi.
CASTRO FSF: Area, Ana, Verónica, Andrea, Lara – quinteto inicial – tamén xogaron Ana María, Jennifer, Noelia, Saínza, Uxía e Zaida.
GOLES: 1-0, minuto 5, Cristina; 2-0, minuto 11, Elena Aragón; 3-0, minuto 17, Lara Balseiro; 4-0, minuto 22, Andrea (p.p.); 5-0, minuto 23, Elena Aragón; 6-0, minuto 24, Jenny; 7-0, minuto 25, Ale de Paz; 8-0, minuto 29, Cristina
ÁRBITROS: López Ramudo // Riveiro Domínguez.
INCIDENCIAS: Cuarto amigable de pretempada das Guerreiras Laranxas, disputado no pavillón Vista Alegre.
Ale de Paz substitúe a Peque na Selección Española
Tras a baixa na ‘Roja’ de Peque, por unha luxación de ombreiro sufrida durante o encontro co Ourense, o Pescados Rubén recibiu o chamamento doutra burelista, a nedense Ale de Paz. A 17 laranxa incorporarase á concentración de España para medirse a Portugal, con Jenny nas súas filas, nos amigables do martes 13 (16.00 horas) e mércores 14 (12.00 horas), na localidade lusa de Quinta dos Lombos.