- Isabel Gundín (Ferrol), Lola Bermúdez (A Coruña), Manuel Fernández (Oleiros) e Samuel Rodríguez (Viveiro), acadaron as wildcards que lles deron acceso á segunda rolda do Pantín Classic.
- O vigués Pablo Cabezas acada o segundo posto en Visual 1 no campionato internacional de surf adaptado Abanca Pantín Classic 2022.
Celebrouse na praia de Pantín, ao abeiro do ABANCA Pantín Classic Galicia PRO 2022 o Campionato Galego de Surf Open nas súas tres categorías: feminina, masculina e máster. Tanto a categoría masculina e feminina contaron con dúas wildcards, o que daba acceso aos vencedores á segunda rolda do evento principal do Pantín Classic.
A pesares de que as ondas non alcanzaron gran tamaño (motivo polo que se suspendeu o Campionato Galego de Longboard), a meteoroloxía foi favorable e contouse cun día solleiro e con moita afluencia de público ao areal de Valdoviño.
Wildcard para a Pantín Classic para Isabel Gundín e Lola Bermúdez
Os gañadores foron en categoría masculina open, o oleirense Manuel Fernández; en categoría feminina open, a ferrolá Isabel Gundín e na categoría máster, o vigués Derick Rey. Os surfistas que acadaron a wildcard para o Pantín Classic, ademais de Manuel Fernández e Isabel Gundín, foron o viveirense Samuel Rodríguez e a coruñesa, Lola Bermúdez, que remataron en segunda posición. Todos os surfistas galegos non conseguiron clasificarse para a seguinte rolda, o que fala do gran nivel da proba celebrada en Valdoviño.
Cómpre destacar o bo nivel amosado polos rapaces do Núcleo de Adestramento Especializado da Federación Galega de Surf, co primeiro posto de Manuel Fernández e o terceiro posto da viveirense Claudia Prieto. O campionato galego realizouse en colaborción co ABANCA Pantín Classic Galicia PRO 2022 que cede o espazo á Federación Galega de Surf para a realización do Campionato.
O pasado domingo tamén se celebrou o campionato internacional de surf adaptado Abanca Pantín Classic 2022, no que o galego Pablo Cabezas acadou un segundo posto na categoría Visual 1.
