A atleta Lucía Ferreiro volve bater o récord de España en salto con pértega, que xa ostentaba ela mesma tras a súa marca obtida no III Control de Pista Cuberta celebrado hai unha semana.
A deportista do Sociedad Gimnástica de Pontevedra foi unha das grandes protagonistas do Campionato Galego Máster que se celebrou na Fundación Expourense.
Alí, Ferreiro superou o listón na altura de 3,06 metros, establecendo un novo récord de España na categoría M40. Anteriormente, ela mesma puxera a marca nos 3,05 metros no xa mencionado III Control, no que tamén rompeu o seu propio récord, establecido en marzo do 2021.
Antes desta data, o récord español era propiedade de Marisa Marcotegui, quen saltou os 3 metros no 2008. Trece anos levaba sen mudar unha marca que a galega xa superou en tres ocasións no último ano.
As plusmarcas máster galegas
Máis aló do éxito de Lucía Ferreiro, as deportistas galegas tamén realizaron grandes marcas no Campionato Galego Máster. No relativo ás plusmarcas, cabe salientar na categoría femenina F65 a Begoña de Arriba do Egovarros na proba dos 3.000 m. e Rosario Sureda do Lucus Caixa Rural quen facía o propio no concurso de altura na categoría F55.
A Federación Galega de Atletismo sinala tamén os récords e as plusmarcas na F50 de Nuria Jones do Club La Purisima en triplo, e a da atleta olímpica rumana afincada en Galicia desde fai varios lustros Felicea Tilea en peso.
Récord mundial
Así mesmo, as probas masculinas tamén foron un espectáculo, destacando o récord do mundo dun combinado galego masculino da categoría máster 65 formado polos atletas Pablo Fervenza do Samertolameu, Domingo Álvarez do Burgas Ourense, Nemesio Gutiérrez do Atletismo Friol e Xosé Luís Otero Cepeda do Atletismo Santiago, quenes lograban parar o reloxo na proba dos 4×800 m. nun rexistro de 10:41.58 pulverizando a anterior plusmarca mundial lograda a finais do ano pasado en Madrid con 10:58.10 en máis de dazasete segundos.
