- Fernando Reyes: “Se había que sacar isto adiante e podía colaborar en que o Guardés non rematase, quería aportar o meu gran de area”.
- Nestes sete anos estivo implicado na actividade deportiva da entidade de distintos xeitos, como colaborador pero sobre todo a través das súas fillas, que xogan nos equipos Cadete e Benxamín da base.
O Club Balonmán Atlético Guardés xa ten novo presidente. O guardés Fernando Reyes González, de 45 anos e socio da entidade dende hai sete, colle as rendas á cabeza da Xunta Directiva da entidade e tomará a remuda de Jesús López na presidencia da entidade da entidade miñota despois de ofrecerse voluntario para resolver a falta de alternativas.
Así, tal e coma se anunciou na Asemblea Xeral Ordinaria de socios deste mércores, será precisamente un dos seus afeccionados quen ocupe o cargo. Fernando Reyes González estivera afincado en Madrid ata 2019, momento no que regresou á Guarda e dende o cal foi, xunto coa súa familia, socio e fiel seguidor da actividade dos equipos da entidade miñota.
Fernando Reyes González acude con asiduidade aos partidos da Sangriña e tamén adoita desprazarse ás citas fóra da casa, coma a Copa da Raíña e outras ocasións sinaladas cada ano, e comparte unha vinculación persoal co Club a través das súas fillas, que xogan nos equipos Cadete e Benxamín da base, explican desde o Club Balonmán Atlético Guardés. Foi tamén por elas que, especialmente nas dúas últimas campañas, comezaba a colaborar tamén en pequenas tarefas organizativas sempre que a Xunta Directiva o precisaba, coma por exemplo a raíz do Sector Nacional e a final europea celebrados o pasado mes de maio.
O novo presidente recolle a remuda de Jesús López con ilusión, aínda que con menos previsión da que lle tería gustado. O motivo principal que alega para terse ofrecido foi a falta de alternativas: “Non quería que o Guardés se acabase, e estabamos no derradeiro minuto e sen unha saída clara”, explica.
Fernando Reyes: “Vou aportar o meu gran de area”
Foi esa urxencia por loitar pola supervivencia do proxecto o que o levou a dar o paso: “Se hai que sacar isto adiante e podo colaborar, pois vou aportar o meu graniño de area”, manifestaba Fernando Reyes González.
Son as mocidades do At. Guardés, ademais, outra das razóns polas que cre que merece loitar malia as dificultades, xunto co que significan estes equipos para o conxunto do pobo guardés. “Para min é importante que haxa unha base de balonmán na vila, non só polas miñas fillas”, indica, “e é unha mágoa que teñamos isto, que é tan grande en comparación co tamaño da Guarda, e que poida chegar a perderse”, engade, facendo referencia ao paradoxal e triste feito de que esta complicada situación chegue no mellor momento da historia da entidade a nivel deportivo.
Fernando Reyes González: “Para min é importante que haxa unha base de balonmán na vila, non só polas miñas fillas”
Ademais, Fernando Reyes González consideraba importante cumprir co “certo compromiso” que había xa co plantel e o corpo técnico contratado para o vindeiro curso 2026/2027.
Nos próximos días, a nova cabeza directiva do equipo miñoto dirixirase á afección con proximidade e honestidade para darse a coñecer mentres confecciona unha Xunta Directiva renovada coa que traballar man a man polo futuro próximo.
Ver esta publicación en Instagram
Os seus obxectivos principais, con paciencia e coa asesoría da dirección anterior, xa pode avanzalos: “Facer isto sostible, sanealo do xeito en que podamos e mantelo dentro do posible no máis alto do balonmán español, que é onde merece estar”.
