Despois dun mal comezo perdendo ante Suecia, as Guerreras da Selección Española de balonmán recupéranse da mellor maneira: vencendo ante Francia por un 25-28.
O combinado español, coa galega Alicia Fernández nas súas filas e a xogadora do Atlético Guardés Paula Arcos xogando de inicio, conseguiu a primeira vitoria nesta edición dos Xogos Olímpicos e o primeiro triunfo olímpico sobre as galas.
Así foi o triunfo das Guerreras ante Francia
O conxunto da Selección Española, con Fernández e Arcos, non contaba con precedentes ao seu favor. Tanto en Atenas 2004, como Londres 2012 e Río 2016, a vitoria caeu sempre do lado francés, pero a historia cambiou en Toquio.
Ao longo deste encontro, as Guerreras foron de menos a máis. Os primeiros minutos de partido estiveron dominados polas francesas, mentres que as vermellas evitaban que as rivais se alonxaran no marcador.
O guion seguiu sen cambios ata o tramo final da primeira parte, cando as españolas colleron o ritmo e comezaron a realizar unha mellor selección dos lanzamentos. O descanso chegou cun 12-12.
Na segunda parte, as Guerreras centráronse na defensa, sen descoidar o ataque, o que lles valeu para poñerse por diante no electrónico. As galas seguiron apretando, presionando e ameazando ás hispanas, que porén aguantaron para asinar o triunfo final.
Segundo partido para Fernández e debut olímpico de Arcos
Este foi o segundo partido olímpico para a galega Alicia Fernández, mentres que supuxo a estrea de Paula Arcos, quen entrou na convocatoria de Carlos Viver por Jennifer Gutiérrez.
A primeira delas anotou dous goles, mentres que a segunda foi autora dun tanto determinante no minuto 38.
A representación galega e do Guardés no equipo español exténdese ao corpo técnico, coa presenza de José I. Prades, adestrador do plantel do Baixo Miño.
¡Enhorabuena, Guerreras! ¡Enhorabuena, @PaulaArcos10 y @joseignacioprad! https://t.co/a1wPCWV78s
— Atlético Guardés (@Atlguardes_ofic) July 27, 2021
