O Durán Maquinaria Ensino ten este mércores (Pazo dos Deportes, 20:15 horas) unha nova oportunidade de sumar unha vitoria e alonxarse da ameaza de descenso. As lucenses adestradas por Fernán Varela recibirán a un Movistar Estudiantes perigoso e que vén de gañar na última xornada a outras galegas, as do BAXI Ferrol.
O preparador afirma que lle da “toda a importancia do mundo ao seguinte partido” xa que cada encontro é vital para o futuro das lucenses. “O que temos que facer é centrarnos no partido de Estudiantes. Sabemos que unha vitoria daríanos moito e unha derrota non é nada dramático polo de agora. Tomamos cada partido como unha final porque sabemos que suma moito cada vez que gañamos”, apunta.
Sobre o seu rival, Varela asegura que é un conxunto que “leva dous anos cunha liña moi marcada”. En poucas palabras, defíneo como un equipo “moi duro, que defende moi ben en media pista e baixo a súa canastra”. Para o Ensino é un cadro “incómodo, que tanto o ano pasado coma este púxonos moitas dificultades. Sabemos que vai ser un partido difícil”.
Apartado de baixas
Para a cita, non estarán na lista de Fernán Varela Tamara Abalde, aínda con molestias, nin María, que segue a recuperarse do seu problema de xeonllo. Quen xa está recuperada “ao 100%” é Georgina, que non presenta máis problemas relacionados coa súa lesión.
Varela: “Estes días tócame ter máis paciencia, facer máis traballo de vídeo e chegar ao partido nas mellores condicións posibles”
O adestrador é consciente de que a carga de partidos pode pasarle factura ás súas xogadoras polo que, aínda que “as xogadoras están encantadas de ter partidos e competición e a min gústame moito adestrar e ter sesións, teño que ter coidado de non sobrecargalas. Estes días tócame ter máis paciencia, facer máis traballo de vídeo e chegar ao partido nas mellores condicións posibles”.
Aproveitando a ocasión, o técnico quixo enviarlle unha mensaxe de apoio a Alicia Villegas, ex xogadora lucense que actualmente milita no BAX Ferrol e que sufriu unha lesión precisamente no partido das ferrolás ante o Movistar Estudiantes: “Quería mandarlle un saúdo e todo o ánimo do mundo a Alicia que o ano pasado estivo aquí con nós. Un abrazo forte e espero que che recuperes o antes posible”.
O rebote defensivo, unha tarefa pendente
Na lista de tarefas pendentes no plantel do Ensino está mellorar o apartado do rebote defensivo, unha das claves da derrota que sufriron as galegas na última xornada ante o Lointek.
“Non estabamos facendo un mal traballo nos partidos anteirores e temos que volver a esa liña. Temos que corrixilo xa porque cunha sangría así (en relación ao último encontro) é practicamente imposible competir, especialmente contra un equipo sólido como o Estudiantes”, asegura o adestrador.
Obxectivo: motivar á afección para que acuda ao Pazo
O Ensino volverá xogar no Pazo este mércores, onde conta cunha peza clave: a afección. Con todo, Fernán Varela quixo evitar as típicas mensaxes animando ao público a acudir ao pavillón, aínda que afirma que “para nós é fundamental ter o apoio da xente”.
Varela: “Gustaríame que se sintan identificados co equipo por como xogamos e competimos, polo esforzo que queremos transmitir”
“Animala é o fácil, dicir que necesitamos o apoio e que veña a xente. Gustaríame que a liña do equipo, o que estamos facendo, faga que a xente que veña ao Pazo queira volver. Gustaríame que levaran un bo recordo, unha boa experiencia no pavillón, que se sintan identificados co equipo por como xogamos e competimos, polo esforzo que queremos transmitir. A partir de aí, centrarnos na parte que depende de nós para que as nenas e nenos de Lugo e os maiores queiran vira ao Pazo e ver os partidos do Ensino”, explicou o adestrador.