Este xoves, ás 20:15 horas, o Durán Maquinaria Ensino recibe no Pazo ao Kangoeroes belga na segunda xornada da EuroCup.
Este será un reto maiúsculo para as galegas, que só contan con cinco xogadoras profesionais en pleno estado de forma. O segundo adestrador das lucenses, Fernán Varela, afirmou que “a preparación a nivel táctico e estratéxico é un pouco diferente pero a nosa mentalidade é seguir adiante como facemos cada día. As xogadoras que están dispoñibles teñen capacidade, nivel e implicación ao 100% para saír a gañar”.
Fernán Varela: “As xogadoras que están dispoñibles teñen capacidade, nivel e implicación ao 100% para saír a gañar”
O preparador admite que “o equipo non está nas condicións que nos gustaría a todos, con xogadoras lesionadas e tocadas”. Para este encontro europeo só Marina Lizarazu, Laura Aliaga, Georgina Bahí, Sofía da Silva e Chatrice White están ao 100%.
“Estamos traballando coas que temos ao 100% para que cheguen nas mellores condicións posibles e coas que están lesionadas tratando de que se recuperen ben e o antes posible para poder axudar ao equipo”, engadiu.
No plantel varias xogadoras clave como Tamara Abalde, Alba Prieto ou Helena Oma non poderán saltar ao parqué lucense.
O axustado calendario tampouco axuda. Por iso, o Ensino solicitou un adiamento á FEB do seu seguinte partido ante o Tenerife: “En principio, a predisposición é boa, o tema é atopar unha data que sexa factible para os dous equipos”, apuntou Varela.
Plantel versátil
Para este xoves, o Ensino apostará polas súas cinco xogadoras, capaces de formar un quinteto competitivo.
“Creo que o equipo que temos, o plantel, na súa totalidade é un plantel versátil. Por desgracia temos que aproveitar esa virtude sabendo que con 5 podemos montar un quinteto para competir”, explicou o técnico.
Varela: “O plantel, na súa totalidade é un plantel versátil”
Ademais, tamén haberá na convocatoria tres xogadoras júnior, “que están en etapa de fomraicón, que teñen ilusion e capacidade de traballo moi grandes”.
Así ven no Ensino ao Kangoeroes
Sobre o rival, Fernán Varela considera que é “un equipo moi versátil, con xogadoras exteriores con capacidade para o un contra un tanto por fóra como por dentro”.
Recentemente, o Kangoeroes xa competiu ao máis alto nivel contra o español Valencia Basket, cun 59-67 final a favor das laranxas. “Agardamos un partido moi duro”, asegurou o adestrador.
Varela: “Agardamos un partido moi duro”
Como punto a favor, o preparador considera que “podemos ter vantaxe de tamaño. A nivel xeral é un equipo grande pero sen xogadoras no interior con tanto tamaño como nós. Pensando non só no rival, senón nas xogadoras das que dispoñemos, con Chatrice, Sofi e Georgina, podemos ter vantaxe nesas posicións. Temos que axustarnos ben con elas e non deixar que exploten as vantaxes individuais no un contra un”, explicou.
A afección como factor clave
Outro factor a favor será xogar en casa. “O apoio da xente sempre é importante”, asegura Varela.
O adestrador agarda que o equipo poida notar o cariño da afección “como se notou na previa da EuroCup. “Loxicamente sería unha marabilla para nós ter a moita xente e notar o apoio dos fieles. Sempre é clave para o equipo”.
Man a man con Ortega
A nivel persoal, Fernán Varela mostrouse ilusionado e agradecido de poder traballar xunto con Miguel Ángel Ortega no Ensino.
“Estou super agradecido de ter a oportunidade de traballar con el. Desde o minuto 1 abriume as portas da súa casa e tratoume coma se me coñecera de toda a vida con total confianza. Traballar cun adestrador coa súa capacidade e experiencia para min é unha oportunidade para cada día. Estou aprendendo moito e estou encantado”.
