Na edición número 26 do Trofeo Internacional de Halterofilia Cidade da Coruña organizado polo Concello da Coruña participaron oito delegacións. Ademais do club anfitrión, Club Halterofilia Coruña, competiron equipos de Alemania, Dinamarca, Gran Bretaña, Portugal, Hungría, un combinado de España e outro de Galicia. Unha vez máis quedou patente o enorme nivel deste deporte na cidade herculina. Falamos con Ferenc Szabo, adestrador do Club Halterofilia Coruña.
A.N.: Como foi este Trofeo internacional que xa é un clásico na halterofilia da cidade?
FERENC SZABO: O feito de que cheguemos á 26ª edición deste torneo xa fala por si mesmo. Este ano o Trofeo Internacional de Halterofilia Cidade da Coruña xa apareceu no calendario da Federación Europea, é un paso adiante. Cada vez coñécennos máis nos países europeos. Este ano faltaron algúns países cos que contabamos. Adoitamos celebrar o torneo o primeiro sábado de xuño. Este ano tocou en xullo e algúns países retiráronse da competición. Aínda así había nivel. Estivo Portugal, Dinamarca, Alemaña, Gran Bretaña, o equipo coruñés que en por si é gañador moitas veces da Copa do Rei, estivo tamén a Selección Galega…
Eu estou contento xa que o Club Halterofilia Coruña gañamos a competición por equipos. As tres primeiras clasificadas femininas son do CH Coruña (Eduarda Sousa, Irene Blanco e Ruth Fuentefría), e os tres masculinos tamén (Víctor Castro, Miguel Portasio, e Martín Liste).
A.N.: Estes resultados confirman unha vez máis o gran nivel do Club Halterofilia Coruña, non só no ámbito estatal, onde se gañan títulos en diferentes categorías ano tras ano, se non tamén no internacional. A canteira da cidade da Coruña promete?
FERENC SZABO: Onde máis forte estamos é na canteira. Creo que o CH Coruña é o mellor club neste aspecto en España. Non se pode discutir. En febreiro celebrouse o Campionato de España por equipos Sub-15 e Sub-17 (masculino e feminino). Das catro categorías en tres quedamos primeiros, na outra, fomos terceiros.
Agora mesmo vanse dúas deportistas ao Campionato de Europa do Sub-15 e Sub-17 e ambos aspiran ao podio, poderán conseguilo ou non. Logo irán tres deportistas do club ao Campionato de Europa Junior e tamén ten posibilidades de podio.
Ferenc Szabo di que o segredo do éxito é o traballo
A.N.: Os xornalistas preguntámoslle moito polo segredo do éxito do CH Coruña, pero é que non deixa de sorprender como nunha cidade como a herculina, que tampouco é unha gran cidade como Madrid, Barcelona ou Valencia, son quen de atopar deportistas que acaban destacando a gran nivel, sendo como é a halterofilia un deporte que non é de grandes masas. O certo é que Ferenc Szabo atopa deportistas na base que son diamantes en bruto, púeos, adéstraos e convérteos en xoias. Como se fai?
FERENC SZABO: Non hai segredos. Traballo, traballo e traballo. Levamos 32 anos. Naquel momento era un deporte minoritario. Agora conseguimos que sexa máis popular, xa nos coñecen. Imos aos institutos seleccionamos aos deportistas que ao noso xuízo poderían ser bos e se acertamos, pois saen campións.
A.N.: Será a substituta de Lidia Valentín coruñesa e quizais mesmo se chame Irene (en alusión a Irene Martínez e Irene Blanco)? Non sabemos o apelido pero podería ser unha Irene coruñesa a que colla a remuda de Lidia Valentín como referente da halterofilia feminina española?
FERENC SZABO: Temos a dúas candidatas. Se non se chamase Irene tampouco pasaría nada, pero é certo que as dúas Irenes ten posibilidades, si.
Ambas as dúas, Irene Martínez e Irene Blanco, apuntan maneiras e atesoran un palmarés que dá envexa, pero só o tempo dirá se o futuro da halterofilia feminina estatal leva o selo do Club Halterofilia Coruña.
De momento, como apuntaba o propio Ferenc Szabo, hai chanzos por subir aos poucos como o Campionato de Europa Sub-15 e Sub-17 onde esta fin de semana están a competir as halteras do club herculino Digna Silo e Paula Canedo coa Selección Española. O dito, hai canteira!
Triunfo do CH Coruña por equipos mixtos no Trofeo Internacional de Halterofilia Cidade da Coruña
