- O titular da Xunta de Galicia, Núñez Feijóo, recibiu no CGTD aos deportistas galegos que veñen de finalizar a súa participación nos Xogos Olímpicos xunto coa conselleira de Emprego e Igualdade, María Jesús Lorenzana, e Jose Ramón Lete Lasa, secretario xeral para o Deporte.
O responsable do Goberno galego, Alberto Núñez Feijóo, trasladou aos deportistas olímpicos galegos a felicitación de toda Galicia pola súa histórica participación nos Xogos de Toquio.
A ese respecto, destacou que se a convocatoria para Tokyo 2020 xa foi todo un fito para Galicia, coa participación 20 deportistas galegos e cinco con licenza galega, as 6 medallas (Teresa Portela, Rodrigo Corrales, Nico Rodríguez, Iván Villar, Ana Peleteiro, Rodrigo Germade e Carlos Arévalo) e 10 diplomas olímpicos acadados (Niko Shera, Raquel Carrera, Tamara Abalde, Alberto Abalde, Iago López Marra, Támara Echegoyen, Adrián Ben, Antía Jácome, Carlos Arévalo, Emmanuel Reyes e Caetano Horta) xa forman parte da historia.
Ante estas cifras, puxo en valor que o 72% dos galegos que participaron nos Xogos Olímpicos quedaron entre os 8 mellores do mundo. “Unha de cada tres medallas españolas fala en galego”, abundou.
Feijóo anuncia a creación dunha Oficina de Atención ao Deportista
Logo de recoñecer o seu esforzo e sacrificio, o presidente da Xunta aproveitou o encontro para anunciar que a Oficina de Atención ao Deportista estará en pleno funcionamento para a tempada que vén, co obxectivo de seguir acompañando aos deportistas no camiño á excelencia. “É un xeito de axudarvos a recoñecer o traballo e tamén de render unha homenaxe a todos os vosos devanceiros olímpicos”.
Máis polo miúdo, explicou que esta oficina orientará e informará, permitirá detectar as necesidades que poidan xurdir e promover actuacións destinadas á divulgación e formación.
Nesa liña, recordou que a Xunta impulsou nos últimos anos preto de medio milleiro de obras para mellorar as infraestruturas deportivas existentes, prestando especial atención ao Centro Galego de Tecnificación Deportiva “a xoia da coroa” no que se levan investidos 4,3 M€.
Finalmente, Feijóo concluíu a súa intervención reiterando o agradecementos infinito por parte de todos os galegos e galegas e a confianza en que este bo resultado teña continuidade nos Xogos Paralímpicos.
Estas declaracións as realizou o presidente da Xunta de Galicia, Alberto Núñez Feijóo, nun acto que congregou a boa parte das e dos deportistas galegos destes Xogos Olímpicos de Tokyo 2020 no Centro Galego de Tecnificación Deportiva (CGTD). Na xuntanza estivo tamén María Jesús Lorenzana, conselleira de Emprego e Igualdade e Jose Ramón Lete Lasa, secretario xeral para o Deporte.
