A Real Federación Galega de Fútbol, e en xeral o fútbol galego,”están a colaborar de maneira directa e decidida no control da propagación da pandemia de COVID”, así o asegura a institución que explica que hoxe máis que nunca o fútbol é “un espazo seguro cun risco moi baixo de contaxio”.
Segundo explica a RFGF ese risco que “se reduce de maneira extraordinaria grazas ao esforzo que se está a facer en todos os estamentos do fútbol, desde as federacións española e galega, pasando polos clubs e deportistas (xogadores e árbitros) e rematando en todos e cada uno dos sanitarios que están a colaborar cos equipos na realización das probas COVID-19”.
Para a RFGF “o esforzo que todos están a facer no cumprimento dos protocolos está sendo encomiable e a isto temos que sumar o altísimo número de test que se veñen realizando”.
A Real Federación Galega de Fútbol informa que despachou nas últimas tres semanas 8.600 test de antíxenos para os clubs que militan en competicións autonómicas e a incidencia de positivos é ínfima: 9 positivos confirmados, polo que estamos a falar dunha incidencia do 0,1%. “Un dato que, sen dúbida, reflicte que o deporte non ten un alto factor de risco de contaxio. Ademais, destes mínimos casos, a orixe da maioría está detectada fóra da actividade deportiva”, argumentan desde a RFGF.
Para a Federación estamos ante “un importante cribado que o fútbol galego está a facer en beneficio de toda a sociedade galega, pois representa un control moi importante para colaborar en frear a expansión do virus”.
30.000 test COVID feitos nas categorías nacionais
Se sumamos os test que a Real Federación Galega de Fútbol despachou desde que comezaron as competicións de ámbito estatal o cribado resulta espectacular, pois nestas categorías son xa case 40.000 os test realizados. No reconto a RFGF explica que falarían duns “5.000 serolóxicos nas primeiras semanas e máis de 30.000 antíxenos logo da convocatoria do programa COnViViendo da Real Federación Española de Fútbol”.
“Resulta case imposible atopar unha entidade fóra da administración pública que participe dunha maneira tan activa e directa no cribado dos posibles positivos COVID na sociedade galega”, defende a federación galega.
Que son os test de antíxenos?
Desde a Real Federación Galega de Fútbol explícase que os test de antíxenos son actualmente a proba de detección do virus da COVID-19 que resulta menos invasiva e máis rápida.
As vantaxes que ofrecen os chamados test de antíxenos é o seu fácil uso, xa que só é necesario un bastón ou hisopo e tomar unha mostra da mucosa. Despois colócase o algodón coa mostra nun anaco de cartón, do tamaño dunha tarxeta, onde están os reactivos que dirán se o resultado é positivo ou negativo, mediante dúas liñas se se ten o coronavirus COVID-19, e unha se non se ten e a proba é polo tanto negativa.
O tempo que hai que esperar para sabelo é, aproximadamente, duns 15 minutos de media. Este período de espera é moito máis rápido que o que se precisa cando se opta por realizar as chamadas probas PCR para detectar a COVID-19. Estes test poden demorarse incluso días.
A RFGF fai un recoñecemento á labor realizada polos clubs
Desde a RFGF agradecen “o extraordinario traballo que están a facer os clubs. Sen a súa colaboración sería case imposible poder levar a cabo este gran cribado”.
A Real Federación Galega de Fútbol destaca que todos os clubs “asumiron a responsabilidade de colaborar coas autoridades aplicando minuciosamente o protocolo, incluso buscando sanitarios que puidesen realizarlle os test aos seus deportistas e comunicando puntualmente ás autoridades sanitarias e á Federación calquera incidencia a ter en conta, asumindo tamén as medidas e as decisións que son necesarias no caso de producirse algún positivo ou algún risco de contaxio”.
Para a federación “os datos son clarividentes. A incidencia resulta escasa e practicamente todos os casos se producen fóra do ámbito deportivo e son precisamente os test que realiza o fútbol os que permiten detectar os positivos que se xeneran lonxe do entorno futbolístico”.
