A pesar da crisis causada polo coronavirus, a Federación Galega de Balonmán pon en marcha varias iniciativas formativas. Coas competicións paralizadas e a xente nos seus fogares para frear a curva, van a ofrecer cursos tantos para monitores como árbitros e desafíos e xogos cos seus seguidores nas redes sociais.
A Federación informa de que “cumprindo as obrigas marcadas polo estado de alarma, a sede da Federación Galega de Balonmán permanecerá pechada ata nova orde“. Lembran que seguirán traballando e que as persoas usuarias poden contactar cos diferentes departamentos por “correo electrónico e contestaremos coa máxima celeridade”. Tamén dan conta de que “nestas semanas de #EuQuedonaCasa hai máis tempo libre do desexado e poucos divertimentos, polo que traballamos na posta en marcha de iniciativas para seguir formándovos e entreténdovos”.
A forma de realizar a formación será de maneira online. O prazo da inscrición para un curso online de monitor de balonmán nivel I abriuse o 15 de marzo e estará aberto ata o 22. O día de inicio será o 25 de dito mes. Conta con só dúas clases presenciais. As cales poden ser cambiadas de data se os usuarios o necesitaran.
Non vai a ser o único. Desde a Federación Galega están a traballar en ofrecer outro de nivel II e un de árbitros. Nos próximos días irán informando sobre eles.
Polo momento, para a próxima semana realizarán un clinic online de cinco días de duración adicado á base. Os profesores serán grandes nomes do balonmán galego e español.
Desafíos sobre balonmán en redes sociais
Desde o pasado luns —16 de mazo— iniciaron unha serie de retos nas redes sociais para medir o grado de coñecemento que teñen en diferentes materias. O primeiro deles, foi sobre o minibalonmán cunha serie de preguntas sobre o tema.
O segundo reto, é un tema interesante para que os seguidores deste deporte entendan mellor ao colectivo arbitral. Eles sempre reciben presións desde as bancadas. Con estas preguntas buscan poñer a proba os coñecementos do regulamento. Xa teñen pensadas as seguintes temáticas para os próximos días.
