A Federación Galega de Balonmán chegou a un acordo coa empresa islandesa Sideline Sports para incorporar o programa XPS Network ao traballo das seleccións galegas e como ferramenta de formación para o alumnado dos cursos territoriais nivel II.
A responsable da área técnica da FGBM, Elena Estévez, valorou positivamente o programa XPS Handball: “a posta en marcha deste sistema de traballo suporá un maior control na planificación e organización e, sobre todo, permitiranos poder marcar unha filosofía común para todos os corpos técnicos”. A Federación ofrecerá ás seleccionadoras a oportunidade de que traballen con este programa, que nestes momentos está a ser utilizado por moitos dos mellores clubs do mundo.
Elena Estévez, responsable da área técnica da FGBM: “A posta en marcha deste sistema de traballo suporá un maior control na planificación e organización e, sobre todo, permitiranos poder marcar unha filosofía común para todos os corpos técnicos”.
Carla Abad, responsable de formación da Federación Galega, asegurou que “é unha aposta importante para a Federación Galega de Balonmán, unha aposta tecnolóxica para que as seleccionadoras coma as novas adestradoras do curso territorial poidan aprender a manexar unha ferramenta que lles dará un salto de calidade e facilitará enormemente o seu labor”.
Elena Estévez, responsable de formación da FGBM: “É unha aposta tecnolóxica para que as seleccionadoras coma as novas adestradoras do curso territorial poidan aprender a manexar unha ferramenta que lles dará un salto de calidade e facilitará enormemente o seu labor”.
O alumnado do curso territorial de adestrador, que acaba de abrir o prazo de inscrición, poderá gozar dun ano de licenza gratuíta para facer uso do XPS Handball. Esta licenza está valorada por riba dos 600€.
A Federación Galega de Balonmán segue traballando no proceso de modernización e adaptación tecnolóxica, que iniciou nesta nova etapa. En pouco máis dun ano foi moito o que se avanzou nesta tarefa. Entre outras iniciativas, houbo cambio de imaxe e de páxina web, unha aposta decidida pola comunicación audiovisual, a posta en marcha dunha plataforma de formación online e agora a contratación deste innovador programa.
