A pelota de baloncesto non volverá a botar nesta tempada. A Federación Galega de Baloncesto anunciou o peche definitivo para a temporada 2019 – 2020. A entidade federativa, tras finiquitar a consulta realizada á súa Asemblea Xeral, na que se lle cuestionaba sobre o criterio de actuación respecto a todas as competicións vixentes ante o escenario de alerta sanitaria e estado de alarma, comunica que estas finalizan de xeito definitivo.
En concreto, e cunha participación total do 73% da Asemblea FGB, a opción resultante como a máis votada, elixida por máis da metade dos votantes foi a de non continuar coa competición, pechando as ligas sen palmarés de campións nin descensos e, no caso daquelas que tivesen establecidos ascensos, disputar fases clasificatorias no futuro, en forma e data a determinar.
“Encaramos unha situación que a Federación Galega de Baloncesto nunca quixera ter que afrontar, pero a prioridade neste intre é a saúde de todos, cumprir as medidas marcadas polas autoridades sanitarias, así como respectar a decisión da Asemblea Xeral, órgano supremo da FGB”, engade no comunicado.
Neste punto, a Federación Galega de Baloncesto lamentou todas as molestias que este peche competitivo pode ocasionar, e quixo recoñecer e agradecer o esforzo humano e a comprensión de toda a familia do Baloncesto Galego: xogadores, adestradores, árbitros, oficiais de mesa, persoal deportivo e directivo dos clubs e afeccionados.
Desde este mesmo intre, a FGB anunciou que continuará traballando a través da súa Comisión Delegada e Xunta Directiva no estudo das bases de competición da vindeira temporada e das medidas necesarias a tomar para protexer ao Baloncesto Galego e ao seus clubs ante o novo escenario sanitario, deportivo e estrutural que debemos afrontar.
Ao final do comunicado, a FGB recordou que continúa dispoñible para o contacto directo con todos os clubs e federados de xeito virtual a través dos seus mails oficiais e redes sociais.
