En relación ao actual escenario de emerxencia sanitaria ante o Coronavirus COVID-19, a Federación Galega de Baloncesto comunica a suspensión da totalidade das súas competicións, tanto de ámbito autonómico como zonal e independentemente da categoría. Esta decisión pasa a ser efectiva desde o pasado 11 de marzo ata o vindeiro 25 de marzo, nun inicio.
Así mesmo, a FGB apraza por tempo indefinido a realización de todas as actividades de carácter formativo e de tecnificación que se tiñan previsto realizar.
Neste momento de cooperación mutua, a FGB aproveitou para agradecer a comprensión e colaboración de todos os activos e axentes do Baloncesto Galego respecto a esta decisión: Non desexamos contribuír de ningún xeito a xerar preocupación ou alarma, pero consideramos que esta medida, que nos afecta e implica a todos, trátase de algo imperiosamente necesario nestes intres.
A Federación Galega de Baloncesto permanecerá en contacto directo coas pertinentes autoridades da nosa Comunidade para manter informados a todos os clubs, colectivo arbitral, federados e afeccionados, sobre posibles novas medidas ou accións a levar a cabo.
