- A conselleira de Promoción do Emprego e Igualdade, María Jesús Lorenzana, recibiu ao equipo directivo da FGB, encabezado polo Presidente, Julio Bernárdez
- Os representantes FGB presentaron á conselleira as súas liñas de acción nos ámbito da igualdade, e en diferentes aspectos laborais, para o ciclo deportivo 2022-2026.
A conselleira de Promoción do Emprego e Igualdade da Xunta de Galicia, María Jesús Lorenzana; e a secretaria Xeral de Igualdade, Susana López Abella, recibiron na tarde do martes, 28 de marzo; aos máximos responsables do basket en Galicia.
O presidente da Federación Galega de Baloncesto (FGB), Julio Bernárdez; acompañado pola vicepresidenta da FGB, Susana García; a secretaria Xeral, Susana Fiuza; o delegado FGB, Jose Cobelo e a responsable de comunicación, María Iglesias; presentáronlles polo miúdo as propostas que a nova dirección do Baloncesto Galego desexa abordar no ámbito da igualdade e no campo formativo.
Segundo explican desde a Federación Galega de Baloncesto entre as accións que a FGB proxecta realizar inclúense “programas de impulso da igualdade en ámbitos como o arbitral e o educativo, así como no escenario da propia competición federada”.
Consideran desde a a Federación Galega que a “importancia da introdución de referentes deportivos para as xogadoras e colexiadas máis novas, así como a análise das realidades da práctica do basket feminino na actualidade en Galicia serán tamén eixos importantes do traballo federativo neste escenario”.
“No marco destas iniciativas, ambas as entidades puxeron sobre a mesa as diferentes vías de materialización das mesmas, na busca de activar campañas comúns que reforcen o papel do baloncesto e dos seus valores e capacidades como motor de igualdade”, explican desde a Federación Galega de Baloncesto (FGB).
O presidente da Federación Galega (FGB), Julio Bernárdez, non quixo pechar o seu encontro coa conselleira e a secretaria Xeral sen “agradecer a súa receptividade ante os diferentes proxectos e amosou o seu compromiso de seguir traballando en comunicación constante coa Consellería”.
