O pasado mes de agosto, coa entrada en vigor do protocolo COVID-19, o público deixaba de poder estar nas bancadas e os atletas só podían acceder no momento de competir. Por iso, a Federación Galega de Atletismo tomou a decisión de retransmitir os torneos vía streaming.
A propia Federación faise cargo dos custes, sen buscar a monetización do contido, “xa que cremos que estamos cumprindo cun servizo público, ao estar prohibida a entrada aos recintos por seguridade”, declaran desde a entidade. Ademais, as imaxes emitidas poden ser utilizadas a posteriori sen problema.
Federación de Atletismo: “Cremos que estamos cumprindo cun servizo público, ao estar prohibida a entrada aos recintos por seguridade”
A Federación de Atletismo adáptase ás novas tecnoloxías
Hai un par de anos a organización xa transmitiu algunha competición a través de terceiros, pero estas prohibicións de acceso ás pistas aceleraron o proceso para poñer en marcha a emisión en directo.
Agora, o atletismo galego tamén se está a profesionalizar neste sentido. Para as retransmisións conta con varias cámaras, algúnhas móbiles e outras fixas, e incorporou rótulos individuais para as saídas das carreiras. Así mesmo, o comentarista interactúa co público a través do chat.
Da mesma forma, os resultados dos concursos móstranse en directo, malia que estes podían seguirse xa a través da web da Federación.
Estas son algunhas das probas retransmitidas vía streaming
O pasado 26 de setembro a Federación fixo unha proba piloto na súa canle de Youtube co Campionato Galego Máster de Pontevedra, que contou con moi boa acollida e motivounos para seguir adiante co proxecto. Un par de semanas despois emitirían o Campionato Galego sub10, sub12 e sub14, aumentando o seu alcance ao tratar as categorías inferiores.
De media, estes streamings tiveron unha audiencia de 60 ou 70 persoas en directo, chegando a picos de 120 espectadores. No seguinte torneo, as cifras aumentaron. Rondaron as 150 persoas de media, chegando por momentos ás 220. Pero as cifras suben moito cando o público pode velos en diferido.
Unha das últimas xornadas que retransmitiron, a de probas combinadas, superaba as 10.000 reproducións en YouTube, días despois da emisión en directo en tres vídeos distintos.
As atletas galegas, tamén na canle da Federación Española
A Federación Española adiantouse aos tempos de pandemia e xa retransmitía en directo na súa canle de Youtube algúns dos campionatos estatais de atletismo.
Os primeiros vídeos do seu canle remóntanse a febreiro do 2019, coa emisión do Campionato de España de clubs en pista cuberta e Copa Iberdrola.
No último deles, o Campionato de España sub16 en pista cuberta, celebrado hai un mes, tamén participaron dúas galegas. Xela Martínez e Carlota Salgado lograron moi bos resultados nesta proba, a primeira acadando o título de campioa e a segunda batendo un récord galego.
Estas foron unhas fazañas que as persoas afeccionadas a este deporte puideron desfrutar en directo, superando as distancias e a pandemia, grazas ao streaming.
Xela Martínez e Carlota Salgado, brillan en Madrid no estatal Sub16
O streaming abre as portas do deporte feminino galego a todo o mundo
