Finalmente non haberá que pagar por ver os vindeiros campionatos de Base de Conxuntos, Campionato de España de Conxuntos e a Final da Liga Iberdrola de Ximnasia Rítmica. A Real Federación Española de Gimnasia anunciaba un sistema de pago por visión (o chamado pay per view ou PPV) para acceder a ver en streaming esas competicións a través de internet.
Desde Galicia, diferentes estamentos desta disciplina entre os que estaban deportistas, familias, clubs e a propia Federación Galega de Ximnasia, encabezada polo seu presidente, José Manuel Estévez Feijoo, amosaran a súa disconformidade coa medida. No caso de Estévez, remitiu unha carta ao presidente da federación estatal. No caso de familias e clubs, abriron unha recollida de sinaturas a través da plataforma Change.org que chegou a recabar 12.500 apoios e na que xa se anuncia que se ten conseguido o acceso de balde.
División de opinións ante a chegada do cobro de ‘streamings’ na rítmica
Ante ao rexeitamento da proposta da RFEG a entidade comunicaba que abría o sistema de visionado, recuando na súa idea de instaurar un pago por visión, e que devolvía os cartos a aquelas persoas que tiveran abonado xa algunha cuantía.
O comunicado da Real Federación Española de Gimnasia di:
En relación á situación acontecida tras a decisión de realizar a retransmisión de streaming da Nacional Base de Conxuntos, Campionato de España de Conxuntos e Final de Liga Iberdrola de ximnasia rítmica a través dun sistema de pago, a RFEG informa que:
É evidente que vivimos momentos difíciles e que, sen dúbida, a prioridade da nosa federación é organizar competicións nacionais para que os nosos deportistas poidan seguir competindo e gozando da ximnasia. A pandemia dificultounos a organización dos eventos onde é moi complicado dispor de medios para a súa correcta organización e asumir os custos para o seu celebración xa que se perderon moitos apoios.
Sempre fomos unha federación moderna, onde as retransmisións dixitais xa conviven connosco desde fai anos e a raíz deste 2021, onde se perderon os apoios económicos externos para a realización destas gravacións, é cando se tomou a decisión de cobrar o acceso á plataforma de visualización das competicións.
Dito isto, todo o equipo da RFEG, consideramos que, despois de analizar a situación de malestar, e escoitando á afición, así como aos nosos federados, decidiuse volver abrir o sistema de retransmisión dunha maneira gratuíta e sen custo para o público.
Procederase a devolver o diñeiro das entradas adquiridas até a data esperando que esta decisión sexa do agradado de toda a familia gimnástica.
Desexamos transmitir unha mensaxe de solidariedade e apoio para todos os clubs, afiliados e demais axentes do noso deporte tomando esta decisión polo ben de todo o noso colectivo.
Desde a Federación Galega de Ximnasia, o seu presidente, José Manuel Estévez Feijoo, pedíalle por carta ao seu homónimo na estatal, o ex ximnasta Jesús Carballo, que “polo ben da ximnasia” se “retractasen da desión”, algo que acaba de acontecer.
Que argumentaba a Federación Galega de Ximnasia?
Na súa misiva, José Manuel Estévez Feijoo, presidente da Federación Galega de Ximnasia trasladaba a, Jesús Carballo, varias preguntas:
“Como imos divulgar este deporte se estamos a esixir aos pais/nais, clubs, adestradores/as, despois dos enormes gastos abordados para poder estar presentes nestas competicións, nun período tan complicado desde o punto de vista sanitario, económico e deportivo, que teñan que pagar por ver aos seus fillos/as, aos seus ximnastas e/ou aos seus compañeiros/as?
Como pretendemos que persoas alleas á actividade, novos afeccionados, tomen interese por esta fermosa especialidade deportiva, se teñen que abonar as cantidades citadas?
Que pasa coas propias compañeiras desprazadas, como participantes, que, por protocolo COVID, non poden estar na instalación, terán que pagar tamén?
Como mantemos a ilusión dos/as novos/as ximnastas, se para poder mirarse no espello das súas compañeiras participantes, dicímoslle que ten que ser previo pago da cantidade fixada na plataforma de ‘streaming’?
Agora, a afección da ximnasia dille adeus ao PPV (pay per view) poderá seguir os campionatos de xeito gratuíto desde as súas casas, sempre que teñan conexión a internet nesta ligazón.
